Halloween party ideas 2015
.

 1. இறைத்தந்தையால் கவரப்படாதவர், உள்ளத்தில் அநாதைகளே

 

2. Astalli மையத்தின் பணிகளுக்கு திருத்தந்தை பாராட்டு

 

3. நிலநடுக்கத்தால் பாதிக்கப்பட்டுள்ளவர்களுக்கு, திருஅவைகள் உதவி

 

4. புலம்பெயர்ந்தவர்களை ஐரோப்பா தாராளத்துடன் வரவேற்கும்

 

5. பல்சமய காலநிலை மாற்றம் அறிக்கையில் இந்தியக் கர்தினால்கள்

 

6. குடியேற்றதாரர் மீது திருத்தந்தை காட்டிவரும் அன்புக்கு ஐ.நா. நன்றி

 

7. திருத்தந்தை அழைத்து வந்த சிரியா அகதிகளின் மகிழ்ச்சி

 

------------------------------------------------------------------------------------------------------

 

1. இறைத்தந்தையால் கவரப்படாதவர், உள்ளத்தில் அநாதைகளே

 

ஏப்.19,2016. இயேசுவின் மீதான இறைத்தந்தையின் அன்பினால் கவரப்படாத கிறிஸ்தவர், ஓர் அனாதை நிலையில் வாழ்வதற்கு ஒப்பாவார் என்றார் திருத்தந்தை பிரான்சிஸ்.

தான் தங்கியிருக்கும் சாந்தா மார்த்தா இல்லத்தின் சிற்றாலயத்தில் இச்செவ்வாய்க்கிழமை காலை திருப்பலி நிறைவேற்றி மறையுரை வழங்கிய திருத்தந்தை பிரான்சிஸ் அவர்கள், நீர்தான் மெசியா என்றால் எங்களிடம் வெளிப்படையாகச் சொல்லிவிடும் என, இயேசுவிடம் யூதர்கள் கேட்ட கேள்விக்கு, இயேசு வழங்கிய பதிலை மையமாக வைத்து தன் கருத்துக்களைப் பகிர்ந்து கொண்டார்.

நான் உங்களிடம் சொல்லியும் நீங்கள் நம்பவில்லை, ஏனெனில் நீங்கள் என் மந்தையைச் சேராதவர்கள் என, இயேசு யூதர்களிடம் கூறியபோது, அவர்களின் விசுவாசக் குருட்டுத் தன்மையை குறிப்பிடுகிறார் என்றார் திருத்தந்தை பிரான்சிஸ். இயேசுவின் போதனைகளையும் செயல்களையும் கண்டும், தங்கள் இதயத்தைக் கடினமாக வைத்துக்கொண்ட பரிசேயர்களும், மறைநூல் அறிஞர்களும், இறைத் தந்தையுடன் தொடர்பற்றவர்களாக, தங்கள் இதயத்தில் அநாதைகளாக இருந்தனர் எனவும் கூறினார் திருத்தந்தை.

தங்களையே மிகப் பெரியவர்களாக நினைத்துக்கொண்டு செயல்பட்ட மறைநூல் அறிஞர்கள், உண்மையில் அநாதைகளாவர், ஏனெனில் அவர்கள் இறைத்தந்தையுடன் எவ்வித நெருங்கிய தொடர்பும் கொண்டிருக்கவில்லை எனவும், தன் மறையுரையில் எடுத்துரைத்த திருத்தந்தை பிரான்சிஸ் அவர்கள், பெருமெண்ணிக்கையில் புறவினத்தார் கிறிஸ்தவத்தைத் தழுவியது பற்றிய செவ்வாய்க்கிழமையின் முதல் வாசகத்தைக் குறித்தும் எடுத்துரைத்தார்.

இயேசுவை நோக்கி நம்மை அழைத்துச் செல்லுமாறு தந்தையிடம் நாம் வேண்டுவோம், ஏனெனில், தந்தையே தூய ஆவியை அனுப்பி, நம் இதயங்களைத் திறப்பதுடன், கிறிஸ்துவை நோக்கி நம்மை வழி நடத்துவார், என மேலும் எடுத்துரைத்து, தன் மறையுரையை நிறைவு செய்தார் திருத்தந்தை பிரான்சிஸ்.

 

ஆதாரம் : வத்திக்கான் வானொலி

 

2. Astalli மையத்தின் பணிகளுக்கு திருத்தந்தை பாராட்டு

 

ஏப்.19,2016. புலம்பெயர்ந்தவர்களுக்கென, உரோம் நகரில் இயேசு சபையினர் நடத்தும்  Astalli மையத்தின் 35 ஆண்டுகாலப் பணிகளைப் பாராட்டியுள்ளார் திருத்தந்தை பிரான்சிஸ்.

இத்தாலியிலுள்ள இயேசு சபை புலம்பெயர்ந்தவர் அமைப்பு வழியாக, உரோம் நகரில், கடந்த 35 ஆண்டுகளாக நடத்தப்பட்டுவரும் இம்மையத்தின் பணி, ஒரே மக்களாக, எல்லாரும் ஒன்றுசேர்ந்து நடக்கும் பணி என்று கூறியுள்ளார் திருத்தந்தை பிரான்சிஸ்.

Astalli மையத்திலுள்ள புலம்பெயர்ந்தவர்கள், தன்னார்வலர்கள், பணியாளர்கள் மற்றும் நண்பர்களுக்கென காணொளிச் செய்தி ஒன்றை இச்செவ்வாயன்று அனுப்பியுள்ள திருத்தந்தை, இப்பணி, அழகானது மற்றும் நீதியானது என்று கூறியுள்ளார்.

புலம்பெயர்ந்தவர்கள், பல நேரங்களில் வரவேற்கப்படாமல் இருக்கின்றனர், இவர்களின் இருப்பு, சமுதாயத்தின் மனநிலையையும், வாழ்க்கைத்தரத்தையும் மாற்றுவதற்கு சவால் விடுகின்றது, இது சமுதாயத்தில் அச்சத்தை ஏற்படுத்தி, அம்மக்கள் புறக்கணிக்கப்படக் காரணமாகின்றது, சமுதாயத்தின் இந்தப் போக்கை மன்னிக்குமாறு புலம்பெயர்ந்தவர்களைக் கேட்டுக்கொண்டார் திருத்தந்தை.

புலம்பெயர்ந்தவர்களுடன் துணிச்சலுடன் உடன்நடந்து, அவர்களை வழிநடத்துமாறும், போரின் கசப்பான துர்நாற்றத்தை இவர்கள் அறிந்திருப்பதால், அமைதிக்கு இட்டுச்செல்லும் பாதைகளையும் அறிந்துள்ளனர் என்றும், திருத்தந்தை தனது காணொளிச் செய்தியில் கூறியுள்ளார்.

 

ஆதாரம் : வத்திக்கான் வானொலி

 

3. நிலநடுக்கத்தால் பாதிக்கப்பட்டுள்ளவர்களுக்கு, திருஅவைகள் உதவி

 

ஏப்.19,2016. "ஈக்குவதோர் மற்றும் ஜப்பானில் நிலநடுக்கத்தில் பலியானவர்களுக்காகச் செபிப்போம்; இறைவனும், அனைத்துச் சகோதர சகோதரிகளும், அவர்களுக்கு, உதவியும், ஆதரவும் அளிப்பார்களாக" என்பது, திருத்தந்தையின் டுவிட்டர் செய்தியாக இத்திங்க் மாலையில் வெளியிடப்பட்டது.

மேலும், இவ்விரு நாடுகளிலும் நிலநடுக்கத்தால் பாதிக்கப்பட்டுள்ளவர்களுக்கு, திருஅவைகளும், காரித்தாஸ் நிறுவனமும் இடர்துடைப்பு உதவிகளை ஆற்றி வருகின்றன.

ஜப்பானின் Kyushu தீவின் Kumamoto நகரில் கடந்த வாரத்தில் இடம்பெற்ற இரு நிலநடுக்கங்களில் பாதிக்கப்பட்டுள்ள ஆயிரக்கணக்கான மக்களுக்கு உதவுவதற்கு, முயற்சிகளை ஒருங்கிணைத்து வருகின்றனர் ஜப்பான் கத்தோலிக்க ஆயர்கள்.

இது குறித்துப் பேசிய, ஜப்பான் காரித்தாஸ் அமைப்பின் தலைவர் ஆயர் Tarcisio Isao Kikuchi அவர்கள், நிலநடுக்கத்தால் சிறிய ஒரு பகுதிதான் சேதமடைந்திருக்கும் என்று நினைத்தோம். ஆனால், மீண்டும் இடம்பெற்ற நிலநடுக்கம், பெரிய அளவில் சேதங்களை ஏற்படுத்தியுள்ளது என்று கூறினார்.

ஏப்ரல் 14, 16 தேதிகளில் ஜப்பானில் இடம்பெற்ற நிலநடுக்கங்களில் குறைந்தது 41 பேர் இறந்துள்ளனர் மற்றும் ஒரு இலட்சத்து எண்பதாயிரம் பேர் வீடுகளை இழந்துள்ளனர்.

மேலும், தென் அமெரிக்க நாடான ஈக்குவதோரில் பலியானவர்களின் எண்ணிக்கை 413 ஐத் தாண்டியுள்ளது.

 

ஆதாரம் : வத்திக்கான் வானொலி

                               

4. புலம்பெயர்ந்தவர்களை ஐரோப்பா தாராளத்துடன் வரவேற்கும்

 

ஏப்.19,2016. திருத்தந்தை பிரான்சிஸ் அவர்கள், லெஸ்போஸ் தீவுக்குச் சென்று வந்த ஒருசில நாள்களுக்குள்ளேயே, மத்திய தரைக் கடலில் மீண்டும் ஒரு சோக நிகழ்வு நடந்துள்ளது, மனிதாபிமானம் குறித்த கேள்வியை எழுப்புகின்றது என்று, திருப்பீட உயர் அதிகாரி ஒருவர் கூறினார்.

புலம்பெயர்ந்தவர்களுக்குப் பால்கன் கடல்பகுதி தடைசெய்யப்பட்டுள்ள நிலையில், மீண்டும் அம்மக்கள் மத்திய தரைக் கடலில் பயணத்தைத் தொடங்கியுள்ளனர் என்றும், மத்திய தரைக் கடலில், இத்தகைய சோக நிகழ்வுகளுக்கு நாம் உண்மையிலே பழக்கப்பட்டு வருகிறோம் என்றும், பலர் ஆபத்தான பயணங்களை மேற்கொள்கின்றனர், ஆனால் கரை சேருகின்றவர்கள் சிலரே என்றும், திருப்பீட குடியெற்றதாரர் அவைத் தலைவர் கர்தினால் Antonio Maria Vegliò அவர்கள் கூறினார்.

திருத்தந்தையின், லெஸ்போஸ் தீவுத் திருத்தூதுப் பயணம் குறித்து, வத்திக்கான் வானொலிக்கு இச்செவ்வாயன்று அளித்த பேட்டியில் இவ்வாறு கூறிய கர்தினால் Vegliò அவர்கள், ஐரோப்பா மிகுந்த தாராளத்துடன் இம்மக்களை வரவேற்பார்கள் என்று நம்புவோம் கூறினார்.

மத்திய தரைக் கடலில் பலியாகியுள்ள புலம்பெயர்ந்த மக்கள், குற்றக்கும்பல்களால் இந்நிலைக்கு ஆளாகியுள்ளனர் என்ற கவலையையும் தெரிவித்தார் கர்தினால் Vegliò

கிழக்கு ஆப்ரிக்காவிலிருந்து ஐரோப்பாவில் குடியேறும் நோக்கத்தில், மத்திய தரைக்கடல் வழியாக, படகுகளில் பயணம் மேற்கொண்ட குடியேற்றதாரர்களில், நூற்றுக்கணக்கானோர் நீரில் மூழ்கியுள்ளதாக மீட்கப்பட்டவர்கள் கூறுகின்றனர்.

இத்திங்களன்று நடுக்கடலில் தத்தளித்துக் கொண்டிருந்த நாற்பதுக்கும் அதிகமான கிழக்கு ஆப்ரிக்கர்கள் மீட்கப்பட்டுள்ளனர். தற்போது, கிரேக்கத்தின் கலமாட்டா பகுதியில் தங்கவைக்கப்பட்டுள்ள அவர்கள், தாங்கள் லிபியாவிலிருந்து புறப்பட்டதாகவும், நடுக்கடலில் ஆள்கடத்தல்காரர்கள் தங்களை வேறொரு படகுக்கு மாறும்படி கூறினர் எனவும் தெரிவித்தனர். அப்படி மாறச்சொன்னப் படகில், ஏற்கனவே 300 குடியேற்றதாரர்கள் இருந்தனர் எனவும் அவர்கள் கூறுகின்றனர்.

 

ஆதாரம் : வத்திக்கான் வானொலி

 

5. பல்சமய காலநிலை மாற்றம் அறிக்கையில் இந்தியக் கர்தினால்கள்

 

ஏப்.19,2016. காலநிலை மாற்றம் குறித்த பல்சமய அறிக்கையில், மும்பைப் பேராயரும், ஆசிய ஆயர் பேரவைகளின் கூட்டமைப்பின் தலைவருமான கர்தினால் ஆஸ்வால்டு கிரேசியஸ், ராஞ்சிப் பேராயர் கர்தினால் டெலஸ்போர் டோப்போ உள்ளிட்ட 250 பல்சமயத் தலைவர்கள் கையெழுத்திட்டுள்ளனர்.

காலநிலை மாற்றம் குறித்த வரலாற்று சிறப்புமிக்க பாரிஸ் ஒப்பந்தம், ஓரிரு நாள்களில் கையெழுத்திடப்படவுள்ளவேளை, இந்தியாவிலிருந்து இருபது சமயத் தலைவர்கள் உட்பட, ஐம்பது நாடுகளின் 250 பல்சமயத் தலைவர்கள், காலநிலை மாற்றம் குறித்த பல்சமய அறிக்கையில் இத்திங்களன்று கையெழுத்திட்டுள்ளனர்.

பாரிஸ் ஒப்பந்தம் குறித்த சமயத் தலைவர்களின் நேர்மறைக் கருத்துக்களை வெளிப்படுத்துவதாய் இந்தப் பல்சமய அறிக்கை உள்ளது எனச் செய்திகள் கூறுகின்றன.  உலக வெப்பநிலையை 1.5 செல்சியுஸ் டிகிரியைத் தக்க வைக்கும் நோக்கத்தில், வாயுக்கள் வெளியேற்றத்தை, 2020ம் ஆண்டுக்குள் கட்டுப்படுத்துவதற்கு பாரிஸ் ஒப்பந்தம் பரிந்துரைக்கின்றது.

காலநிலை மாற்றம் குறித்த வரலாற்று சிறப்புமிக்க பாரிஸ் ஒப்பந்தம், ஏப்ரல் 22, பூமி தினத்தன்று, நியுயார்க்கில் கையெழுத்திடப்படவுள்ளது. ஐ.நா. பொதுச் செயலர் பான் கி மூன் தலைமையில் நடைபெறும் இதில் இந்தியாவும் கையெழுத்திடும்.

 

ஆதாரம் : India Blooms / வத்திக்கான் வானொலி

 

6. குடியேற்றதாரர் மீது திருத்தந்தை காட்டிவரும் அன்புக்கு ஐ.நா. நன்றி

 

ஏப்.19,2016.  உலகின் புலம்பெயர்ந்தவர்கள் மற்றும் குடியேற்றதாரர் மீது திருத்தந்தை பிரான்சிஸ் அவர்கள் காட்டிவரும் ஒருமைப்பாட்டுணர்வுக்கு நன்றி தெரிவித்துள்ளது, ஐ.நா.வின் UNHCR புலம்பெயர்ந்தவர் நிறுவனம்.

திருத்தந்தை பிரான்சிஸ் அவர்கள், கிரேக்க நாட்டின் லெஸ்போஸ் தீவுக்குச் சென்று, புலம்பெயர்ந்தவர்களைச் சந்தித்து, மூன்று குடும்பங்களைத் தன்னுடன் உரோமைக்கு அழைத்து வந்துள்ளது பற்றிக் குறிப்பிட்ட UNHCR நிறுவன இயக்குனர் Filippo Grand அவர்கள், இது ஒருமைப்பாட்டுணர்வின் சக்திமிக்க வெளிப்பாட்டின் அடையாளம் என்று  தெரிவித்தார்.

துன்பமான சூழல்களிலிருந்து கட்டாயமாக வெளியேறும் பெருமளவான மக்கள், தடைச்சுவர்களையும், புறக்கணிப்புக்களையும், பயத்தையும் எதிர்கொள்ளும் இன்றைய உலகில், திருத்தந்தையின் இச்செயல், அரசுகளுக்கும், சமூகங்களுக்கும் தூண்டுதலாக அமைய வேண்டும் என்றும் கூறினார் Grand.

இன்றைய உலகில், போர், கலவரங்கள் மற்றும் துன்புறுத்தலால், கட்டாயமாக வெளியேறியுள்ள ஏறக்குறைய ஆறு கோடிப் பேர் தங்கள் வாழ்வுக்காகப் போராடுகின்றனர். இரண்டாம் உலகப் போருக்குப் பின்னர், புலம்பெயர்ந்தவர் எண்ணிக்கை தற்போது அதிகம். இவர்களில் ஏறக்குறைய இரண்டு கோடிப் பேர் அகதிகள். இவர்களில் பாதிக்கும் மேற்பட்டோர் சிறார் என்று ஐ.நா. கூறுகிறது. 

 

ஆதாரம் : UN / வத்திக்கான் வானொலி

 

7. திருத்தந்தை அழைத்து வந்த சிரியா அகதிகளின் மகிழ்ச்சி

 

ஏப்.19,2016. கிரேக்கத்தின் லெஸ்போஸ் தீவிலிருந்து திருத்தந்தையுடன் இத்தாலி வந்து அடைக்கலம் பெற்றுள்ளதை ஓர் இறையாசீராக நோக்குவதாக அறிவித்துள்ளனர், திருத்தந்தையுடன் விமானத்தில் வந்த மூன்று அகதிக் குடும்பத்தினர்.

சிரியாவிலிருந்து தப்பி ஓடி, துருக்கி வழியாக கிரேக்கத்தின் தீவை அடைந்த அகதி மக்களுள் மிகவும் துன்பத்திற்குள்ளாகியுள்ள மூன்று குடும்பங்களுக்கு இரக்கத்தின் ஓர் அடையாளமாக இத்தாலியில் அடைக்கலம் வழங்க திருத்தந்தை விரும்பியதைத் தொடர்ந்து, 12 பேர் அடங்கிய இந்த மூன்று இஸ்லாமியக் குடும்பங்களும் திருத்தந்தையுடன் விமானத்தில் இத்தாலிக்கு கொணரப்பட்டு, கத்தோலிக்கப் பிறரன்பு நிறுவனமான சான் எஜிதியோ அமைப்பின் பொறுப்பில் விடப்பட்டுள்ளனர்.

திருத்தந்தையின் இந்தக் கருணைச்செயல் குறித்து தன் நன்றியை வெளியிட்ட இந்த 12 பேரில் ஒருவரான ஒசாமா என்பவர், அமைதிக்கு மதங்கள் எதுவும் இல்லை, நாமனைவரும் மனிதர்கள், மனிதாபிமானம் நிறைந்தவர்கள் என்பதையே இது காண்பிக்கிறது என்றார்.

ஹாசன் மற்றும் நூர் தமபதியினர் இது பற்றி குறிப்பிடுகையில், ஒவ்வொரு மதத்தலைவரும் திருத்தந்தையைப்போல் மற்றவர்களுக்கு உதவி செய்வதில் ஈடுபடவேண்டும் என்றனர்.

தாங்கள் இஸ்லாமியராக இருந்தபோதிலும், இஸ்லாமியத் தலைவர்கள் இத்தகைய பரிவுடன் தங்களை அணுகவில்லை எனவும் கவலையை வெளியிட்டனர் அத்தம்பதியர்.

இதற்கிடையே, தான் ஆற்றியுள்ள இச்செயல் கடல் போன்ற உலகத் தேவைகளின்முன் ஒரு சிறு நீர்த்துளியே எனினும், இத்துளியைப் பெற்றபின், கடல் இப்போதுபோல் இருக்காது என அன்னை தெரேசா ஒருமுறை வழங்கிய பதிலையே தற்போது அகதிகளுடன் விமானத்தில் வரும்போதும் பத்திரிகையாளர்களிடம் கூறினார் திருத்தந்தை என்பது குறிப்பிடத்தக்கது.

 

ஆதாரம் : CNS/வத்திக்கான் வானொலி

 

 

இது இரக்கத்தின் காலம்...

 

இலட்சம் டாலர் சம்பளத்திற்கும் மேல்...

 

24 வயது நிரம்பிய இளையவர் இராபர்ட் லீ (Robert Lee) அவர்கள், சிறுவனாய் இருந்தபோது, தன் பள்ளி நண்பர்கள், உணவை வீணாக்குவதைக் கண்டு அதிர்ச்சியடைந்தார். இராபர்ட் அவர்களின் பெற்றோர், கொரியாவிலிருந்து அமெரிக்க ஐக்கிய நாட்டிற்குக் குடிபெயர்ந்தவர்கள். எனவே, உண்ணும் உணவை வீணாக்குவது தவறு என்பதை, சிறுவயது முதல் இராபர்ட் மனதில் ஆழமாய் பதித்தவர்கள்.

நியூ யார்க் பல்கலைக் கழகத்தில் இராபர்ட் படித்துக்கொண்டிருந்தபோது, 'உணவு சேகரிக்கும் கழகம்' ஒன்றை அவர் உருவாக்கினார். பல்கலைக் கழகத்தின் உணவகம், விடுதிகள் இவற்றில் வீணாகும் உணவை, இக்கழகம் சேகரித்து, அருகிலிருந்த வீடற்றோர் விடுதிக்கு தினமும் வழங்கி வந்தது.

கல்லூரிப் படிப்பை முடித்த இராபர்ட், J.P.Morgan என்ற புகழ்பெற்ற நிறுவனத்தில் வேலைக்குச் சேர்ந்தார். அருகிலிருந்த பெரும் உணவு விடுதிகளில் வீணாகும் உணவை, ஒவ்வொரு நாள் இரவிலும் சேகரிக்கத் துவங்கினார், இராபர்ட். இவரது முயற்சியைப் பாராட்டி, பல உணவகங்கள் உணவளிக்க முன்வந்தன. அந்தந்தப் பகுதியில் சேகரிக்கப்படும் உணவை, அருகிலுள்ள வீடற்றோர் விடுதிகளுக்கு எடுத்துச் செல்ல, தன்னார்வத் தொண்டர்களும் முன்வந்தனர். நியூ யார்க் நகரில் ஆரம்பமான இம்முயற்சி, விரைவில் மற்ற நகர்களிலும் பரவத் துவங்கியது.

தன் ஒய்வு நேரத்தில் இப்பணியைச் செய்துவந்த இராபர்ட், அதை, ஒய்வு நேரப்பணியாக மட்டும் செய்வது போதாது என்பதை உணர்ந்தார். J.P.Morgan நிறுவனத்தில் தன் வேலையை 'இராஜினாமா' செய்துவிட்டு, 'மீதமான உணவைக் காப்பாற்றும் அமைப்பு' - Rescuing Leftover Cuisine (RLC) - என்ற முயற்சியை தன் முழுநேரப் பணியாகச் செய்து வருகிறார் இராபர்ட். "இந்த அமைப்பின் உதவியால், 300 பேர் மூன்று நாட்கள் வயிறார உண்ணமுடிகிறது" என்று, ஒரு வீடற்றவர் விடுதியிலிருந்து வந்த மின்னஞ்சல், தன் வேலையை இராஜினாமா செய்யும் முடிவை எடுக்கத் தூண்டியது என்று இராபர்ட் கூறினார்.

"இலட்சம் டாலர்க்கு மேல் வருமானம் தரும் வேலையை விட்டுவிட்டு, வீடற்றோருக்கு உணவு தரச் செல்வீர்களா? 24 வயது இளையவர் சென்றார்" என்ற தலைப்பில், இராபர்ட் லீ பற்றிய செய்தி, Readers Digest இதழில் வெளியாகியிருந்தது.

இரக்கத்தால் கிடைக்கும் நிறைவை, இலட்சம் டாலர்கள் தர இயலாது.

 

ஆதாரம் : வத்திக்கான் வானொலி

 

 




--
தமிழ் தேடுப்பொறி மேம்படுத்தப்படுதல் குழு

SEO/SMO Team

Post a Comment

Powered by Blogger.