Halloween party ideas 2015
.

1. லெஸ்போஸ் திருத்தூதுப் பயணத்திற்காகச் செபிக்க அழைப்பு

 

2. லெஸ்போசில் புலம்பெயர்ந்தவர்களுக்கு இக்கட்டான சூழல்

 

3. போலந்து திருமுழுக்குப் பெற்றதன் 1050ம் ஆண்டு

 

4. தானியங்கும் உயிர்க்கொல்லி ஆயுதங்களுக்குத் தடை விதிக்க..

 

5. கர்தினால் தாக்லே : நவீனத் தீமைகளுக்கு இரக்கமே மருந்து

 

6. இலங்கையில் தோட்டத் தொழிலாளரின் வாழ்க்கைத்தரம் உயர..

 

7. சீனாவில் பெற்றோரைப் பிரிந்து ஆறு கோடிப் பிள்ளைகள்

 

------------------------------------------------------------------------------------------------------

 

1. லெஸ்போஸ் திருத்தூதுப் பயணத்திற்காகச் செபிக்க அழைப்பு

 

ஏப்.13,2016. அண்மை மாதங்களில், ஏராளமான புலம்பெயர்ந்த மக்கள் கடந்து சென்ற லெஸ்போஸ் தீவுக்கு, வருகின்ற சனிக்கிழமையன்று தான் மேற்கொள்ளும் திருத்தூதுப் பயணத்திற்காகச் செபிக்குமாறு, திருப்பயணிகளைக் கேட்டுக்கொண்டுள்ளார் திருத்தந்தை பிரான்சிஸ்.

இப்புதன் காலையில், வத்திக்கான் தூய பேதுரு வளாகத்தில் கூடியிருந்த பல்லாயிரக்கணக்கான பயணிகளுக்கு மறைக்கல்வியுரை வழங்கிய பின்னர், தனது லெஸ்போஸ் தீவுப் பயணம் பற்றிக் குறிப்பிட்ட திருத்தந்தை, எனது சகோதரர்கள் கான்ஸ்டான்டிநோபிள் முதுபெரும் தந்தை முதலாம் பர்த்தலோமேயு, கிரேக்க ஆர்த்தடாக்ஸ் சபைத் தலைவரும், ஏத்தென்ஸ் பேராயருமான 2ம் Hieronimus ஆகிய இருவருடன் அங்குச் செல்வதாகத் தெரிவித்தார்.

லெஸ்போஸ் தீவு மற்றும் கிரேக்க நாட்டு அனைத்துக் குடிமக்கள், இன்னும், புலம்பெயர்ந்த மக்கள் எல்லாருடனும் ஒருமைப்பாட்டுணர்வைத் தெரிவிக்கும் நோக்கத்தில், நாங்கள் மூவரும் அங்குச் செல்வதாகக் கூறிய திருத்தந்தை பிரான்சிஸ் அவர்கள், தூய ஆவியார் மற்றும் அன்னைமரியிடம் செபிக்குமாறு கேட்டுள்ளார்.

கான்ஸ்டான்டிநோபிள் கிறிஸ்தவ ஒன்றிப்பு முதுபெரும் தந்தை முதலாம் பர்த்தலோமேயு, கிரேக்க நாட்டு அரசுத்தலைவர் Prokopis Pavlopoulos ஆகிய இருவரின் அழைப்பின்பேரில் லெஸ்போஸ் தீவுக்குச் செல்கிறார் திருத்தந்தை பிரான்சிஸ்.

லெஸ்போஸ் தீவு, துருக்கி நாட்டுக் கடற்பரப்பில் அமைந்துள்ள கிரேக்க நாட்டுத் தீவாகும். அண்மையில், ஐரோப்பிய ஒன்றியத்திற்கும், துருக்கி நாட்டிற்கும் இடையே ஏற்பட்டுள்ள உடன்பாட்டின்படி, கிரேக்க நாட்டிற்கு வரும் புலம்பெயர்ந்தவர்கள் துருக்கிக்கு அனுப்பப்பட வேண்டும்.  

98 விழுக்காட்டு கிரேக்க ஆர்த்தடாக்ஸ் சபை கிறிஸ்தவர்கள் வாழ்கின்ற கிரேக்க நாட்டின் ஏத்தென்ஸ் நகருக்கு, 2001ம் ஆண்டில், புனித திருத்தந்தை 2ம் ஜான் பால் அவர்கள் திருத்தூதுப் பயணம் மேற்கொண்டார். ஆயிரத்திற்கு மேற்பட்ட ஆண்டுகளுக்குப் பின்னர், அந்நாட்டுக்கு ஒரு திருத்தந்தை சென்றது அதுவே முதன்முறையாக அமைந்தது. அடுத்து, 2016ம் ஆண்டு, ஏப்ரல் 16, வருகிற சனிக்கிழமையன்று திருத்தந்தை பிரான்சிஸ் அவர்கள் கிரேக்க நாட்டின் லெஸ்போஸ் தீவுக்குச் செல்கிறார்.

மேலும், இப்புதனன்று திருத்தந்தை பிரான்சிஸ் அவர்கள் வெளியிட்டுள்ள டுவிட்டர் செய்தியில், குடும்பங்களின் இன்னல்கள், போராட்டங்கள், மகிழ்வு மற்றும் நம்பிக்கைகளில், ஆண்டவரின் பிரசன்னம் குடிகொண்டிருக்கின்றது(315) என்று எழுதியுள்ளார்.

 

ஆதாரம் : வத்திக்கான் வானொலி

 

2. லெஸ்போசில் புலம்பெயர்ந்தவர்களுக்கு இக்கட்டான சூழல்

 

ஏப்.13,2016. லெஸ்போஸ் தீவில் புலம்பெயர்ந்த மக்கள் இக்கட்டான ஒரு சூழலை எதிர்நோக்கிவரும் நிலையில், திருத்தந்தை பிரான்சிஸ் அவர்கள் லெஸ்போஸ் தீவுக்குச் செல்கிறார் என்று, கிரேக்க கத்தோலிக்க காரித்தாஸ் நிறுவனம் கூறியது.

லெஸ்போஸ் தீவுக்குப் புதிதாக வந்துசேரும் புலம்பெயர்ந்த மக்கள், துருக்கிக்கு அனுப்பப்பட வேண்டும் என்று, ஐரோப்பிய ஒன்றியமும் துருக்கி நாடும் இம்மாதத்தில் ஏற்படுத்திய ஒப்பந்தத்தின்படி, புலம்பெயர்ந்த மக்கள், துருக்கிக்கு அனுப்பப்பட்டுவருவது பற்றிக் குறிப்பிட்ட காரித்தாஸ் நிறுவனம், அத்தீவில் வாழும் புலம்பெயர்ந்தவர்கள், திருத்தந்தையின் வருகையை ஆவலோடு எதிர்நோக்கி இருப்பதாகக் கூறியது.

2015ம் ஆண்டில் பத்து இலட்சத்துக்கும் மேற்பட்டவர்களும், 2016ம் ஆண்டில், ஒரு இலட்சத்து ஐம்பதாயிரம் மக்களும் லெஸ்போஸ் தீவைக் கடந்து சென்றுள்ளனர் என்றும், இவர்களில் ஏறக்குறைய பாதிப் பேர் லெஸ்போஸ் தீவுக்கு வந்துள்ளனர் என்றும் கிரேக்க காரித்தாஸ் நிறுவனம் கூறியது.

இந்தப் புலம்பெயர்ந்த மக்கள், போர் மற்றும் ஏழ்மையினால், தங்கள் நாடுகளைவிட்டு வெளியேறியவர்கள் என்றும், இவர்களில் 55 விழுக்காட்டினர் பெண்கள் மற்றும் சிறார் என்றும் அந்நிறுவனம் கூறியது.

லெஸ்போஸ் தீவில், புலம்பெயர்ந்த மக்களுக்கென, 220 படுக்கைகளைக்கொண்ட 88 அறைகளை காரித்தாஸ் நிறுவனம் அமைத்து உதவி வருகிறது.

 

ஆதாரம் : வத்திக்கான் வானொலி

 

3. போலந்து திருமுழுக்குப் பெற்றதன் 1050ம் ஆண்டு

 

ஏப்.13,2016. போலந்து நாடு திருமுழுக்குப் பெற்றதன் 1050ம் ஆண்டு நிறைவை, இப்புதன் பொது மறைக்கல்வியுரையில் குறிப்பிட்டு, அந்நாட்டிலும், வெளிநாடுகளிலும் வாழும் போலந்து மக்களுக்காக, இறைவனிடம் இறைஞ்சினார் திருத்தந்தை பிரான்சிஸ்.

இப்புதன் மறைக்கல்வியுரையில் கலந்துகொண்ட ஏராளமான போலந்து மக்கள், அந்நாட்டின் ஆயர்கள் மற்றும் விசுவாசிகளுடன் சேர்ந்து, இந்த வரலாற்று முக்கியத்துவம் வாய்ந்த நிகழ்வுக்காக, இறைவனுக்குத் தான் நன்றி கூறுவதாகவும் தெரிவித்தார் திருத்தந்தை.

இந்த வரலாற்று நிகழ்வு, போலந்து மக்களை விசுவாசத்திலும், ஆன்மீகத்திலும், கலாச்சாரத்திலும் உருவாக்கியுள்ளது என்றும், இம்மக்களை, கிறிஸ்து, தமது மரணம் மற்றும் உயிர்ப்புப் பேருண்மையில் பங்குகொள்வதற்கு அழைக்கிறார் என்றும் கூறினார் திருத்தந்தை பிரான்சிஸ்.

புனித திருத்தந்தை 2ம் ஜான் பால் அவர்கள் கூறியிருப்பது போன்று, இறைத்தந்தை, திருமகன், தூய ஆவியார் பெயரால் திருமுழுக்குப் பெற்ற ஆயிரம் ஆண்டுகளுக்கு மேலான இக்கொடைக்கு, நம் ஆண்டவருக்கு நன்றி கூறுவோம் என்றார் திருத்தந்தை பிரான்சிஸ்.

போலந்து நாட்டின் இக்கால மற்றும் வருங்காலத் தலைமுறைகளும் திருமுழுக்கு அருளுக்கு விசுவாசமாக இருந்து, கிறிஸ்து மற்றும் திருஅவையின் அன்புக்குச் சாட்சிகளாக வாழுமாறும் கேட்டுக்கொண்டார் திருத்தந்தை.

966ம் ஆண்டில், போலந்து அரசர் முதலாம் Mieszko அவர்கள் கிறிஸ்தவத்தை ஏற்றுக்கொண்டதை நினைவுகூரும் விதமாக, வருகிற வெள்ளிக்கிழமையன்று, போலந்து பாராளுமன்றத்தின் இரு அவைகளும் Poznań நகரில் கூடவுள்ளன.

 

ஆதாரம் : வத்திக்கான் வானொலி

 

4. தானியங்கும் உயிர்க்கொல்லி ஆயுதங்களுக்குத் தடை விதிக்க..

 

ஏப்.13,2016. மனிதரின்றி, தானியங்கும் உயிர்க்கொல்லி ஆயுதங்கள், அனைத்து விதமான பயங்கரவாதத் தாக்குதல்கள் மற்றும் பிற தாக்குதல்களுக்கு எதிராக, அப்பாவி மக்களைப் பாதுகாப்பதில்லை என்று, திருப்பீட அதிகாரி ஒருவர் கூறினார்.

சுவிட்சர்லாந்து நாட்டின் ஜெனீவாவிலுள்ள ஐ.நா. அலுவலகங்கள் மற்றும் பிற பன்னாட்டு நிறுவனங்களுக்கான திருப்பீடத்தின் நிரந்தரப் பார்வையாளர் பேராயர் Ivan Jurkovič அவர்கள், தானியங்கும் உயிர்க்கொல்லி ஆயுத அமைப்புகள் குறித்த வல்லுனர்கள் கூட்டத்தில் இத்திங்களன்று ஆற்றிய உரையில் இவ்வாறு கூறினார்.

மனிதரின்றி, தானியங்கும் உயிர்க்கொல்லி ஆயுதங்களைப் பயன்படுத்துபவர்கள், தங்கள் உயிரையும் தியாகம் பண்ணுவதற்குத் தயாராக உள்ளார்கள் என்றும், இவர்கள் பயனற்ற முறைகளைக் கையாள்கின்றனர் என்றும் கூறினார் பேராயர் Jurkovič.

நீதி நிலைநாட்டப்படவும், மனித உரிமைகள் மதிக்கப்படவும், சிறுபான்மையினர் மதிக்கப்படவும், ஒருங்கிணைந்த வளர்ச்சி ஊக்குவிக்கப்படவும், அரசியல் ஈடுபாட்டிற்குமென இடம்பெறும் சண்டையே, உண்மையான போர் எனவும் கூறினார் பேராயர் Jurkovič.

 

ஆதாரம் : வத்திக்கான் வானொலி

 

5. கர்தினால் தாக்லே : நவீனத் தீமைகளுக்கு இரக்கமே மருந்து

 

ஏப்.13,2016. உயிர்த்த கிறிஸ்துவால்கூட அகற்ற முடியாத பல காயங்களை இவ்வுலகம் கொண்டிருக்கின்றது என்று, மனிலா கர்தினால் லூயிஸ் அந்தோனியோ தாக்லே அவர்கள் கூறினார்.

உயிர்ப்பு ஞாயிறைத் தொடர்ந்து, மெட்ரோ மனிலாவில் நடைபெற்ற ஆண்டுத் தியானத்தில், நவீனத் தீமைகள் பற்றி உரையாற்றிய கர்தினால் தாக்லே அவர்கள்,  இரக்கம் மற்றும் பரிவன்பை உண்மையிலேயே அனுபவிப்பதற்கு, விசுவாசிகள், சமுதாயத்தின் காயங்களைப் பார்த்து, அவற்றைத் தொட வேண்டும் என்று கூறினார்.

குடும்பத்தில் பிரமாணிக்கமின்மை, ஊட்டச்சத்துப் பற்றாக்குறை, கலாச்சாரப் பெருமை உணர்வு, தன்னலப்போக்கு, இனவாதம், சமூக ஊடகங்களைத் தவறாகப் பயன்படுத்தல், திருஅவைக்குள் இடம்பெறும் உரிமை மீறல்கள், புறக்கணிப்புகள் போன்ற சமுதாயத்தின் காயங்களைக் குறிப்பிட்டுப் பேசினார் கர்தினால் தாக்லே.

குடும்பத்தில் உறவுகள் இல்லாமல் இருப்பது, ஆழமான காயங்களை ஏற்படுத்துகின்றன, இதைக் குழந்தைகளும், பேரப்பிள்ளைகளும் கற்றுக்கொள்ளக் கூடும் என்றும் எச்சரித்தார் கர்தினால் தாக்லே.

ஆதாரம் : CBCP / வத்திக்கான் வானொலி

 

6. இலங்கையில் தோட்டத் தொழிலாளரின் வாழ்க்கைத்தரம் உயர..

 

ஏப்.13,2016. இலங்கையில், தேயிலைத் தோட்டங்களில் வேலைசெய்வதற்கென, பிரித்தானிய காலனி ஆட்சியில், இந்தியாவிலிருந்து வரவழைக்கப்பட்ட தொழிலாளரின் வாழ்க்கைத்தரம் மேம்படுத்தப்பட வேண்டும் என்று, இலங்கை காரித்தாஸ் நிறுவனம் அரசை வலியுறுத்தியுள்ளது.

சமூகத்தில் ஓரங்கப்பட்டுள்ள தேயிலைத் தோட்டத் தொழிலாளர் மற்றும் அவர்கள் குடும்பங்களின் ஊதியமும், குடியிருப்பு உரிமைகளும் உயர்த்தப்பட வேண்டும் என்று கேட்டுள்ளது காரித்தாஸ் நிறுவனம்.

இலங்கையின் வளமைக்கு முக்கிய காரணிகளாக இருப்பவைகளில் தேயிலை உற்பத்தியும் ஒன்றாகும். ஆயினும், இத்தொழிலாளர்கள், குறைந்த ஊதியம் மற்றும் போதுமான குடியிருப்பு வசதியின்றி உள்ளனர்.

இவ்விவகாரம் குறித்து, இலங்கை தேசிய உரையாடல் அமைச்சர் மனோ கணேசன் மற்றும் 325 தேயிலைப் பண்ணைகளின் தலைவர்களுடன் கூட்டம் நடத்திய, கண்டி காரித்தாஸ் இயக்குனர் அருள்திரு டெஸ்மன்ட் பெரேரா அவர்கள், தோட்டத் தொழிலாளரின் வாழ்க்கைத்தரம் உயர்த்தப்பட வேண்டுமெனக் கேட்டுக்கொண்டுள்ளார்.

இத்தொழிலாளரின் தினக்கூலி குறைந்தது ஆயிரம் ரூபாயாவது வழங்கப்படுமாறு அரசை வலியுறுத்துவதாக, அருள்திரு பெரேரா அவர்கள் கூறினார்.

 

ஆதாரம் : UCAN / வத்திக்கான் வானொலி

 

7. சீனாவில் பெற்றோரைப் பிரிந்து ஆறு கோடிப் பிள்ளைகள்

 

ஏப்.13,2016. சீனாவில், பெருநகரங்களில் தங்கி வேலை செய்யும் பெற்றோர்களால் கிராமங்களில் கைவிடப்பட்ட பிள்ளைகளின் எண்ணிக்கை ஏறக்குறைய ஆறுகோடி இருக்கலாம் என்று, ஒரு கணக்கெடுப்பு கூறுகின்றது.

சீனாவின் முக்கியமான சமூகச் சவால்களில் ஒன்றான, பெற்றோரிடமிருந்து பிரிந்திருக்கும் குழந்தைகள் என்பதால், அது குறித்த தேசியக் கணக்கெடுப்பு ஒன்று ஆரம்பிக்கப்பட்டிருக்கிறது.

பிள்ளைகள் தங்களைத் தாங்களே கவனித்துக்கொள்ளும் நிலை உருவாகியிருப்பதாகவும், சில பள்ளிகளில் 80 விழுக்காட்டுக்கும் அதிகமான மாணவர்கள் பெற்றோர் இல்லாமல் வளர்கிறார்கள் எனவும் கூறப்படுகின்றது.

எடுத்துக்காட்டாக, பதினான்கு வயது தவ் லானும் அவர் தம்பியும், தங்களுக்கான காய்கறிகளைத் தாங்களே பயிரிடுகிறார்கள் மற்றும் உணவையும் அவர்களே சமைத்துக் கொள்கிறார்கள் என்றும் கூறப்படுகின்றது. இவர்களின் பெற்றோர் ஆயிரம் மைலுக்கு அப்பால் வேலை செய்கிறார்கள். ஆண்டுக்கொருமுறை மட்டுமே வந்து செல்கிறார்கள்.

 

ஆதாரம் : பிபிசி / வத்திக்கான் வானொலி

 

 

இது இரக்கத்தின் காலம்...

 

 

ஞானத்தை எங்கும் தேடாதே!

 

ஒரு பெரிய பணக்காரர் தன் பெரிய மாளிகையில், மனைவி, குழந்தைகளுடன் எந்த ஒரு குறையுமின்றி மகிழ்வாக வாழ்ந்து வந்தார். ஒருநாள் அவர் மனம், மிகவும் நிம்மதியிழந்து இருந்தது. அதனால் அவர் ஞானத்தைத் தேடிப் புறப்பட்டார். தன் குதிரையில் பல ஊர்களுக்குச் சென்று பல துறவிகள், ஞானிகள் மற்றும் குருக்களைச் சந்தித்து, அவர்கள் கால்களில் தங்கத்தையும், வைரத்தையும் வைத்து, தனக்கு ஞானம் தருமாறு வேண்டினார். இருப்பினும் அவர்களால் அவருக்கு ஞானத்தைத் தரமுடியவில்லை. அப்போது அவரிடம் அந்த வழியாக வந்த ஒருவர், இந்தக் காட்டின் உட்பகுதியில் ஒரு குகையில் ஜென் குரு வாழ்ந்து வருகிறார். அவரிடம் நீங்கள் சென்று உங்கள் பிரச்சனையைச் சொன்னால், அவர் கண்டிப்பாகத் தீர்த்து வைப்பார் என்று கூறினார். ஒரு மூட்டை நிறையப் பணத்தை எடுத்துக் கொண்டு, அந்த காட்டின் உட்பகுதியில் அந்த குருவைத் தேடிச் சென்றார் இவர். எப்படியோ நீண்ட நாள் அலைச்சலுக்குப் பிறகு, அந்தக் குருவின் குகையைக் கண்டுபிடித்து, அவரை வணங்கி தன் பிரச்சனையைக் கூறினார். பின் அந்த குரு அவரிடம், "நீ இங்கே எப்படி வந்தாய்" என்று கேட்டார். அதற்கு அவர், "குதிரையில்!" என்றார். பின் அவர், "அப்படியென்றால் எதற்கு ஞானத்தைத் தேடுகிறாய், முதலில் உன் குதிரையைத் தேடு!" என்று கூறினார். உடனே பணக்காரர் அவரிடம், "என்ன குருவே, முட்டாள் தனமாக பேசுகிறீர்கள், என்னிடம்தான் குதிரை இருக்கிறதே, பின் எதற்கு நான் தேட வேண்டும்" என்று சொன்னார். பிறகு குரு சொன்னார், "எப்படி உன்னிடம் குதிரை இருக்கிறதோ, அதேபோல்தான் ஞானமும் உன்னிடமே இருக்கிறது. ஆகவே அதைத் தேடி வெளியே செல்லாமல், உனக்குள்ளேயே தேடித் தெரிந்துக்கொள்" என்று கூறி, குகைக்குள் சென்று தியானம் செய்ய ஆரம்பித்துவிட்டார்.

 

ஆதாரம் : வத்திக்கான் வானொலி

 




--
தமிழ் தேடுப்பொறி மேம்படுத்தப்படுதல் குழு

SEO/SMO Team

Post a Comment

Powered by Blogger.