Halloween party ideas 2015
.

 

1. நல்லிணக்கத்தோடு வாழ்வது தூய ஆவியாரின் கொடை

 

2. நற்செய்தியின் அழகை வாழ்வதற்கு ஆண்டவரிடம் வரம்

 

3. உக்ரைனுக்கென திரட்டப்படும் நிதியை கோர் ஊனும் விநியோகிக்கும்

 

4. ஊழலற்ற தேர்தலுக்கு பிலிப்பைன்ஸ் திருஅவை நடவடிக்கை

 

5. நேபாளம் : கிறிஸ்மஸ், தேசிய விடுமுறை நாளிலிலிருந்து நீக்கம்

 

6. வத்திக்கான் அருங்காட்சியகம் : இரத்த தானத்தை ஊக்குவிக்கின்றது

 

7. உலகளாவிய தோழமையின் புதிய யுகத்திற்கு ஐ.நா. அழைப்பு

 

8. உலகில் இராணுவத்திற்கான செலவு அதிகரிப்பு

 

------------------------------------------------------------------------------------------------------

 

1. நல்லிணக்கத்தோடு வாழ்வது தூய ஆவியாரின் கொடை

 

ஏப்ரல்,05,2016. ஒரு கிறிஸ்தவ சமூகம், நல்லிணக்கத்தோடு வாழ்கின்றதென்றால், அது தூய ஆவியார் அருளும் கொடையால்தான் என்று, சாந்தா மார்த்தா இல்லச் சிற்றாலயத்தில், இச்செவ்வாய் காலையில் நிறைவேற்றிய திருப்பலி மறையுரையில் கூறினார் திருத்தந்தை பிரான்சிஸ்.

திருத்தூதர் பணிகளிலிருந்து எடுக்கப்பட்ட, இந்நாளையத் திருப்பலியின் முதல் வாசகத்தை (தி.தூ.4:32-37) மையப்படுத்தி மறையுரையாற்றிய திருத்தந்தை பிரான்சிஸ் அவர்கள், முதல் கிறிஸ்தவ சமூகத்தின் உணர்வுகளையும், வாழ்க்கைத் தரத்தையும், நல்லிணக்கம் என்ற ஒரே வார்த்தையில் அடக்கி விடலாம் என்று கூறினார். 

முதல் கிறிஸ்தவ சமூகத்தின் வாழ்வு, அனைவரின் நன்மைக்காக, விழுமியங்களையும், செல்வத்தையும் பகிர்ந்து கொண்டதன் அடிப்படையில் அமைந்த, ஒன்றித்த வாழ்வு என்றுரைத்த திருத்தந்தை, கிறிஸ்துவில் ஒன்றித்துள்ள ஒரு சமூகம், துணிச்சல் கொண்ட சமூகம் என்றும் கூறினார். 

நாம் ஒருவகையான அமைதி பற்றி நாம் பேசலாம், ஆனால், நல்லிணக்கம் என்பது உள்ளத்தில் பொழியப்படும் அருளாகும், இது தூய ஆவியாரால் மட்டுமே அருளப்படும் என்றும், திருஅவையின் முதல் கிறிஸ்தவர்களை ஒன்றிணைத்த நல்லிணக்கம், தூய ஆவியாரின் கொடையாகும் என்றும், இது மனிதரால் ஆனது அல்ல என்றும் கூறினார் திருத்தந்தை பிரான்சிஸ்.

தேவையில் இருப்பவர் யாரும் இருக்க மாட்டார்கள், எல்லாமே பகிர்ந்து கொள்ளப்படும், இவையிரண்டும் நல்லிணக்கத்தின் இரு அடையாளங்கள் என்றும் மறையுரையில் கூறிய திருத்தந்தை, இறைவனும், பணமும் ஒத்திணங்க முடியாத இரு தலைவர்கள் என்றும் கூறினார்.

 

ஆதாரம் : வத்திக்கான் வானொலி

 

2. நற்செய்தியின் அழகை வாழ்வதற்கு ஆண்டவரிடம் வரம்

 

ஏப்ரல்,05,2016. "நற்செய்தியின் உண்மை, அழகு மற்றும் வாழ்வை மாற்றும் வல்லைமையை ஒளிரச் செய்யும் மனிதர்களாக வாழ்வதற்கு ஆண்டவரிடம் வரம் கேட்போம்" என்ற சொற்களை, திருத்தந்தை பிரான்சிஸ் அவர்கள், தன் டுவிட்டர் செய்தியாக, இச்செவ்வாயன்று வெளியிட்டார்.

மேலும், இந்த ஏப்ரல், மே மாதங்களில் திருத்தந்தை பிரான்சிஸ் அவர்கள் நிறைவேற்றும் திருவழிபாடுகள் குறித்த விபரங்களை, திருத்தந்தையின் திருவழிபாடுகளுக்குப் பொறுப்பாளரான, பேரருள்திரு குய்தோ மரினி அவர்கள் வெளியிட்டுள்ளார்.

ஏப்ரல் 17, ஞாயிறு காலை 9.15 மணிக்கு வத்திக்கான் தூய பேதுரு பசிலிக்கா பேராலயத்தில், புதிய அருள்பணியாளர்களுக்குத் திருப்பொழிவு மற்றும் ஏப்ரல் 24, ஞாயிறன்று, வத்திக்கான் தூய பேதுரு வளாகத்தில், காலை 10.30 மணிக்கு, சிறுவர் சிறுமியர் யூபிலித் திருப்பலியை நிறைவேற்றுவார் திருத்தந்தை பிரான்சிஸ்.

மே 5, வியாழன் மாலை 6 மணிக்கு, வத்திக்கான் தூய பேதுரு பசிலிக்கா பேராலயத்தில், கண்ணீரைத் துடைத்தல் என்ற தலைப்பில் மாலை வழிபாடு, மே 15, ஞாயிறு காலை 10 மணிக்கு வத்திக்கான் தூய பேதுரு பசிலிக்கா பேராலயத்தில் தூய ஆவியார் பெருவிழா திருப்பலி, மே 26, வியாழன் மாலை 7 மணிக்கு, புனித ஜான் இலாத்தரன் பசிலிக்கா வளாகத்தில், இயேசுவின் திருஉடல், திருஇரத்தப் பெருவிழா திருப்பலி, மே 29, ஞாயிறு காலை 10.30 மணிக்கு, வத்திக்கான் தூய பேதுரு வளாகத்தில், தியாக்கோன்கள் யூபிலித் திருப்பலி ஆகியவற்றை நிறைவேற்றுவார் திருத்தந்தை பிரான்சிஸ்.

 

ஆதாரம் : வத்திக்கான் வானொலி

 

3. உக்ரைனுக்கென திரட்டப்படும் நிதியை கோர் ஊனும் விநியோகிக்கும்

 

ஏப்ரல்,05,2016. திருத்தந்தை பிரான்சிஸ் அவர்களின் விண்ணப்பத்தின்பேரில், உக்ரைன் நாட்டு மக்களின் துயர் துடைப்பதற்கென, ஐரோப்பாவில் உள்ள அனைத்து கத்தோலிக்க ஆலயங்களிலும் திரட்டப்படும் நிதியை, திருத்தந்தையின் பிறரன்பு அலுவலகமான கோர் ஊனும் திருப்பீட அவை விநியோகிக்கவுள்ளது.

ஐரோப்பாவிலுள்ள அனைத்து கத்தோலிக்க ஆலயங்களிலும், ஏப்ரல் 24, ஞாயிறன்று உக்ரைனுக்கென நிதி திரட்டப்படும்.

உக்ரைன் அரசுப் படைகளுக்கும், இரஷ்யாவுக்கு ஆதரவான பிரிவினைவாதப் படையினருக்கும் இடையே, அந்நாட்டின் கிழக்குப் பகுதியில் தொடர்ந்து நடைபெற்று வரும் சண்டையினால், உக்ரைன் மக்கள் பெருமளவில் துன்பங்களை அனுபவிக்கின்றனர்.

உக்ரைன் நாட்டில், 2014ம் ஆண்டு ஏப்ரலில் தொடங்கிய இச்சண்டையில் ஒன்பதாயிரத்துக்கு மேற்பட்ட மக்கள் கொல்லப்பட்டுள்ளனர், 17 இலட்சம் பேர் புலம் பெயர்ந்துள்ளனர் மற்றும் 15 இலட்சம் பேர் பசியால் வாடுகின்றனர். மேலும், ஏறக்குறைய மூன்று இலட்சம் பேருக்கு, உடனடி உணவும், உணவுப் பாதுகாப்பும் தேவைப்படுகின்றன என்று, ஐ.நா.வின் உலக உணவுத் திட்ட அமைப்பு கூறியுள்ளது.

13 இலட்சம் பேர், குடிதண்ணீர், எரிவாயு மற்றும் மின்சாரமின்றி கடுமையாய்த் துன்புறுகின்றனர் என்றும் ஐ.நா. கூறியுள்ளது..

 

ஆதாரம் : UN /வத்திக்கான் வானொலி

 

4. ஊழலற்ற தேர்தலுக்கு பிலிப்பைன்ஸ் திருஅவை நடவடிக்கை

 

ஏப்ரல்,05,2016. பிலிப்பைன்ஸ் நாட்டில் பொதுத் தேர்தல் நடைபெறுவதற்கு ஏறக்குறைய ஐந்து வாரங்களே உள்ளவேளை, அந்நாட்டில், சுதந்திரமான மற்றும் நியாயமான தேர்தல்கள் இடம்பெறுவதற்கு, தலத்திருஅவை தீவிர நடவடிக்கையில் இறங்கியுள்ளது.

பொய்யர்கள், கடவுள் நம்பிக்கையற்றவர்கள் மற்றும் வன்முறையைத் தூண்டும் வேட்பாளர்களுக்கு வாக்களிக்க வேண்டாமெனக் கேட்டுள்ளனர் ஆயர்கள்.

கடந்த ஞாயிறன்று அறிக்கை வெளியிட்டுள்ள, Dipolog ஆயர் Severo Caermare அவர்கள், தங்களை அடிமையாக்கும் அனைத்திலுமிருந்து விடுதலை பெறுமாறும், கடந்த காலத்தில் நடந்தவைகளைக் கண்முன்கொண்டு வருகின்ற தேர்தலில் ஓட்டளிக்குமாறும் வாக்காளர் பெருமக்களைக் கேட்டுள்ளார்.

மேலும், பேராயர் சாக்ரட்டீஸ் வில்லெகாஸ் அவர்கள், வெளியிட்டுள்ள அறிக்கையில், பொய் சொல்வது, பன்முகங்களைக் கொண்ட சாத்தானின் வேலையாகும் என்றும், மக்கள், ஞானத்துடன் செயல்பட்டு, பொய்யர்களுக்கு ஓட்டளிக்க வேண்டாமெனக் கூறியுள்ளார்.

 

ஆதாரம் : UCAN/  வத்திக்கான் வானொலி

 

5. நேபாளம் : கிறிஸ்மஸ், தேசிய விடுமுறை நாளிலிலிருந்து நீக்கம்

 

ஏப்ரல்,05,2016. நேபாளத்தின் தேசிய விடுமுறை நாள்கள் பட்டியலிலிருந்து கிறிஸ்மஸ் பெருவிழா நாளை நீக்குவதற்கு அரசு தீர்மானித்துள்ளதற்கு எதிர்ப்புத் தெரிவித்து, கிறிஸ்மஸ், அரசு விடுமுறை நாளாகத் தொடர்ந்து கடைப்பிடிக்கப்பட வேண்டும் என்று கிறிஸ்தவர்கள் வலியுறுத்தியுள்ளனர்.

இது குறித்து ஆசியச் செய்தி நிறுவனத்திடம் கூறிய, நேபாளக் கிறிஸ்தவர்களின்  தேசியக் கூட்டமைப்பின் பொதுச் செயலர் அருள்பணி CB Gahatraj அவர்கள், கிறிஸ்மஸ் தேசிய விடுமுறையாக இல்லாவிட்டால், தனியார் நிறுவனங்களில் வேலைசெய்பவர்களால், இப்பெருவிழாவைக் கொண்டாட முடியாது என்று தெரிவித்தார்.

இந்துக்கள் மற்றும் பிற சமூகங்களின் 83 விழாக்களை அங்கீகரித்துள்ள நேபாள அரசு, கிறிஸ்தவர்களின் ஒரு விழாவைக்கூட அங்கீகரிக்கவில்லை என்றும் கூறினார் அருள்பணி CB Gahatraj. மேலும், கிறிஸ்தவர்கள் தங்கள் கோரிக்கையை வலியுறுத்தி, பிரதமர் மற்றும் உள்துறை அமைச்சரிடம் மனுக்களைச் சமர்ப்பித்துள்ளனர்.

இதற்கிடையே, பொது விடுமுறை நாள்கள் அதிகரித்துவருவதைக் கட்டுப்படுத்தவே, இத்தீர்மானத்தை அரசு கட்டாயமாக எடுக்க வேண்டியிருந்தது, மாறாக, கிறிஸ்தவர்களைப் புண்படுத்துவது எங்கள் நோக்கமல்ல என்று, நேபாள உள்துறை அமைச்சர் Shakti Basnet அவர்கள் கூறியுள்ளார்.

எட்டு ஆண்டுகளுக்கு முன்னர், நேபாளம் சமயச் சார்பற்ற நாடாக மாறியபோது, கிறிஸ்மஸ், அரசு விடுமுறை நாளாக அறிவிக்கப்பட்டது.

 

ஆதாரம் : Asianews/ வத்திக்கான் வானொலி

 

6. வத்திக்கான் அருங்காட்சியகம் : இரத்த தானத்தை ஊக்குவிக்கின்றது

 

ஏப்ரல்,05,2016. மருத்துவமனைகளுக்கு இரத்தம் தேவைப்படுவதைக் கருத்தில் கொண்டு,   உரோம் மருத்துவமனைகளுடன் இணைந்து இரத்த தானத்தை ஊக்குவிக்கும் நடவடிக்கையில் இறங்கியுள்ளது வத்திக்கான் அருங்காட்சியகம்.

மேற்குலக மாபெரும் கலாச்சாரப் பாரம்பரியத்தை ஊக்குவிக்கும் நோக்கத்திலும் இம்முயற்சியில் இறங்கியுள்ள வத்திக்கான் அருங்காட்சியகம், உரோம் நகரின் Tor Vergata Policlinico (பொது மருத்துவமனை), மருத்துவமனை ஆன்மீகப் பொறுப்பாளர்கள், In punta di piedi என்ற தன்னார்வ அமைப்பு ஆகியவற்றுடன், இரத்த தான விழிப்புணர்வு நடவடிக்கையில் இணைந்துள்ளது.

Tor Vergata இரத்த தான மையத்தில் சான்றிதழ் பெறுபவர்கள், வத்திக்கான் அருங்காட்சியகத்தைப் பார்வையிட நீண்ட வரிசையில் வெகுநேரம் காத்திருக்கத் தேவையில்லை மற்றும் அவர்களுக்கு, நுழைவுக் கட்டணச் சீட்டிலும் சிறப்புத் தள்ளுபடி கிடைக்கும் என்றும் கூறப்பட்டுள்ளது.

RossoArte அமைப்பின் முயற்சியால் இந்த ஆண்டு முழுவதும் இச்சலுகை உண்டு. இது குறித்த மேலும் விபரங்கள், வருகிற வியாழனன்று நடைபெறும் பத்திரிகையாளர் கூட்டத்தில் அறிவிக்கப்படும்.

 

ஆதாரம் : வத்திக்கான் வானொலி

 

7. உலகளாவிய தோழமையின் புதிய யுகத்திற்கு ஐ.நா. அழைப்பு

 

ஏப்ரல்,05,2016. உலகில் முதன் முறையாக நடைபெறவிருக்கும் மனிதாபிமான உச்சி மாநாட்டில் கலந்துகொள்ளவரும் நாடுகள் மற்றும் அரசுகளின் தலைவர்கள், புதியதோர் உலகை அமைப்போம் என்ற உறுதிப்பாட்டுடன் வருகை தருமாறு கேட்டுக்கொண்டுள்ளார் ஐ.நா. பொதுச்செயலர் பான் கி மூன்.

துருக்கி நாட்டின் இஸ்தான்புல் நகரில், வருகிற மே 23, 24 தேதிகளில் நடைபெறவிருக்கும் முதல் உலக மனிதாபிமான உச்சி மாநாடு பற்றிப் பேசிய பான் கி மூன் அவர்கள், இதில் கலந்துகொள்பவர்கள் எத்தகைய மனநிலையைக் கொண்டிருக்க வேண்டும் என்பது பற்றி விளக்கியுள்ளார்.

மனித சமுதாயம் அழிந்துகொண்டிருக்கும் இன்றைய உலகத்தின் நிலையைத் தொடர்ந்து ஏற்க முடியாது என்ற உறுதியான செய்தியுடன், இம்மாநாட்டில் கலந்துகொள்ளுமாறும், இந்த நல்ல தருணத்தை நாம் எப்படி பயன்படுத்துகிறோம் என்பதை வரலாறே தீர்ப்புச் சொல்லும் என்றும் கூறியுள்ளார் பான் கி மூன்.

அரசியல் தலைவர்கள், சண்டைகளைத் தடுத்து அவற்றுக்கு முடிவு காண வேண்டும்,    மனித சமுதாயத்தைப் பாதுகாக்கும் விதிமுறைகளைக் கடைப்பிடிக்க வேண்டும், மனித சமுதாயத்தில் முதலீடு செய்ய வேண்டும், தேவையில் இருக்கும் இலட்சக்கணக்கான மக்களைப் பறக்கணிக்கக் கூடாது போன்ற நோக்கங்களுடன் இந்த மாநாடு இடம்பெறவுள்ளது.

 

ஆதாரம் : UN/  வத்திக்கான் வானொலி

 

8. உலகில் இராணுவத்திற்கான செலவு அதிகரிப்பு

 

ஏப்ரல்,05,2016. உலகில் இராணுவத்திற்கெனச் செலவிடப்படும் தொகை, சில ஆண்டுகளுக்குப் பின்னர், மீண்டும் கடந்த 2015ம் ஆண்டில் அதிகரித்திருப்பது, உலக அமைதிக்குப் பெரும் ஆபத்தாக உள்ளது என்று ஓர் ஆய்வு எச்சரித்துள்ளது.

சுவீடன் நாட்டின், SIPRI என்ற Stockholm பன்னாட்டு அமைதி ஆய்வு நிறுவனம் வெளியிட்டுள்ள தகவலில், கடந்த 2015ம் ஆண்டு முழுவதும் இராணுவத்திற்கெனச் செலவிடப்பட்ட தொகை, ஏறக்குறைய 1,700 பில்லியன் டாலர் என்றும், இது, 2014ம் ஆண்டைவிட ஒரு விழுக்காடு அதிகம் என்றும் கூறியுள்ளது.

உலகில் இராணுவத்திற்கென அதிகமாகச் செலவிடும் நாடுகளில், அமெரிக்க ஐக்கிய நாடு, சீனா, சவுதி அரேபியா, இரஷ்யா என்ற வரிசையில், ஜப்பான் எட்டாவது இடத்தில் உள்ளது.

ஐ.எஸ். தீவிரவாதிகளுக்கு எதிரான போராட்டம், ஏமனில், சவுதி தலைமையிலான கூட்டுப்படைத் தாக்குதல், சவுதி அரேபியாவில் ஈரானின் அச்சுறுத்தல்கள், தென் சீனக் கடலில், சீன இராணுவப் படையின் விரிவாக்கம், கிரிமியா மற்றும் உக்ரைன் விவகாரங்களில் இரஷ்ய இராணுவத்தின் நடவடிக்கைகள், ஈராக் மற்றும் சிரியாவில் ஐ.எஸ் பயங்கரவாதத்திற்கு எதிரான வான்வெளித் தாக்குதல்கள் உள்ளிட்ட காரணங்களால் பல நாடுகள் தங்களின் இராணுவ பலத்தை அதிகரிப்பதில் அதிக ஆர்வம் காட்டி வருகின்றன என்று கூறப்பட்டுள்ளது.

குறிப்பாக, அமெரிக்க ஐக்கிய நாடு, 596 பில்லியன் டாலர்களையும், சீனா 215 பில்லியன் டாலர்களையும், சவுதி அரேபியா, 87.2 பில்லியன் டாலர்களையும், ஈராக் 13.1 பில்லியன் டாலர்களையும் இராணுவத்திற்காகச் செலவிடுகின்றன என்று அந்த ஆய்வில் தெரிவிக்கப்பட்டுள்ளது.

 

ஆதாரம் : Agenciesவத்திக்கான் வானொலி

 

இது இரக்கத்தின் காலம்...

 

ஓரங்களை மையமாக்க...

 

ஒரு கற்பனைக் காட்சி இது. செல்வந்தர் ஒருவரின் மகனுக்குத் திருமணம் நிகழ்கிறது. திருமண விழாவின் முக்கியக் கட்டமாக, மாலை மாற்றுதல், தாலி கட்டுதல் ஆகிய நிகழ்வுகள் நடைபெறவிருக்கின்றன. பொதுவாக, இந்நேரங்களில் முக்கியமான ஒருவர், மாலைகளை எடுத்துக் கொடுக்க, அவற்றை மணமக்கள் மாற்றிக்கொள்வர். அனைவரும் ஆவலுடன் எதிர்பார்த்துக் காத்துக்கொண்டிருந்த அந்நிகழ்வுக்கு முன், மணமகனின் தந்தை மேடையில் ஏறி, 'மைக்'கில் பேசுகிறார்: "இந்தத் திருமணவிழா நல்ல முறையில் நடைபெற பெரிதும் உதவியவர்கள் பலர். அவர்களில் ஒருவரை, நான் மேடைக்கு அழைக்கப்போகிறேன்" என்று அந்த செல்வந்தர் கூறுகிறார்.

மணமேடைக்கு முன், முதல் வரிசையில் அமர்ந்திருக்கும் பல முக்கியப் புள்ளிகள், தங்களில் யாரை அவர் அழைக்கப் போகிறார் என்ற எதிர்பார்ப்பில் காத்திருக்கின்றனர். மணமகனின் தந்தையோ, அரங்கத்திற்குப் பின்புறம் செல்கிறார். வீடியோ காமராக்கள் அவரைத் துரத்திச் செல்கின்றன. அரங்கத்தின் பின்புறம், துப்புரவு செய்யும் பத்து தொழிலாளர்கள் நின்று கொண்டிருக்கின்றனர். அவர்களில் வயது முதிர்ந்த ஒருவரை, அரங்கத்திற்குள் அழைத்து வருகிறார், மணமகனின் தந்தை. மாலைகளை எடுத்து, மணமக்களிடம் தரும்படி, அந்த முதியவரிடம் கேட்கிறார், செல்வந்தர்.

சமுதாயத்தின் ஓரங்களில் வாழ்வோரைத் தேடிச்செல்வதும், அவர்களை மீண்டும் மையங்களுக்குக் கொணர்வதும் திருஅவையின் முக்கியப் பணி என்று, திருத்தந்தை பிரான்சிஸ் அவர்கள் கூறியுள்ளதை நாம் அறிவோம். ஓரங்களை மையமாக்க, இரக்கத்தின் காலம், இனிதான தருணம். 

 

ஆதாரம் : வத்திக்கான் வானொலி

 

 




--
தமிழ் தேடுப்பொறி மேம்படுத்தப்படுதல் குழு

SEO/SMO Team

Post a Comment

Powered by Blogger.