Halloween party ideas 2015
.

பெறுநர்
மாண்புமிகு மோடி அவர்கள்
இந்திய பிரதமர்
புதுதில்லி
நாள் - 29.3.2016
அய்யா வணக்கம்
பொருள் - தாங்கள் தருவதாக வாக்குறுதி அளித்த ரூ 1500000 பணம் உடனடியாக வேண்டி.
கடந்த நாடாளுமன்றத்தேர்தலில் தாங்கள் பிரதமராக போட்டியிட்டு பெருமைக்குரிய வெற்றியை ஈட்டினீர்கள் . மூன்று முறை சென்னையில் அப்போது பிரச்சாரம் செய்தீர்கள் . அந்த மூன்று கூட்டத்திலும் , "நான் ஆட்சிக்கு வந்தால் பதுக்கி வைக்கப்பட்டிருக்கும் பல லட்சம் கோடி கறுப்புப் பணத்தை மீட்பேன் ! மீட்டவுடன் ஒவ்வொரு இந்தியனின் வங்கிக்கணக்கில் ரூபாய் பதினைந்து லட்சம் செலுத்துவேன் என்றீர்கள் ! அதையும் நூறே நாளில் தருவதாக பொது மேடையில் வாக்குறுதி அளித்தீர்கள் ! உங்களைத் தொடர்ந்து பேசியவர்களும் அதை அமோதித்தார்கள் !
இந்தியா முழுவதும் இதைச்சொல்லியே பிரச்சாரம் செய்தீர்கள் ! பெரும்பான்மை இடங்களில் வென்று ஆட்சி செய்கிறீர்கள் !
அய்யா நான் உங்கள் தீவிர பக்தன். தங்கள் சொல்லை வேதமாக ஏற்பவன். நீங்கள் வாக்குத்தவறாத பிரம்மச்சாரி என்று எங்கள் ஊர் எச்.ராஜா அவர்களும் பலமுறை கூறியுள்ளார்.
அய்யா , நீங்கள் பிரச்சார மேடையில் இருந்து கீழே இறங்கிய அடுத்த நொடி , உங்கள் வாக்குறுதியை நம்பி பதினைந்து லட்சம் கடனாக பெற்றுவிட்டேன் !
வட்டி கொடுத்து என்னால் சமாளிக்க முடியவில்லை. நூறுநாளில் தருவதாக, தங்கள் வாக்குறுதியை நம்பிக் கடன் வாங்கி விட்டேன்.
100 நாள் தற்போது 700 நாளாகிவிட்டது ! அய்யா நீங்கள் மானஸ்தன் ! பலமுறை உங்களைத் தொடர்பு கொண்டேன்.நீங்கள் வெளிநாட்டில் இருப்பதாக சொன்னார்கள் !
நீங்கள் கறுப்புப் பண மீட்பில் இருந்தீர்கள் என்பதை நான் நன்கு அறிவேன் ! எனக்கு கடன் தந்தவர்களும் அதை நம்பினார்கள் !
ஆனால் , கடந்த சில மாதங்களாக கறுப்புப் பண விவகாரம் குறித்து பேச மறுக்கிறீர்கள். உங்கள் மன் கீ பாத்திலும் பதினைந்து லட்சம் பற்றி பேச மறுக்கிறீர்கள்!
உங்கள் மீது எனக்கு இன்னும் நம்பிக்கை இருக்கிறது. ஆனால் , எனக்கு பணம் கொடுத்தவர்களை சமாளிக்க இயலவில்லை . அதில் பல வங்கிகளும் அடக்கம். உங்கள் அருண்ஜெட்லி , வாரா கடன் வசூல்களை வேறு தீவிரப்படுத்தி உள்ளார் !
ஜி... விஜயமல்லய்யாவை போல் நான் ஓடி ஒளிபவன் அல்ல ! என் நேர்மையை வங்கிகள் சந்தேகிப்பதில் எனக்கு கவலை இல்லை ! அதன் மூலம் உங்கள் நேர்மையையும் அவர்கள் சந்தேகிப்பதை என்னால் தாங்கிக்கொள்ள இயலவில்லை !
எங்கள் வீட்டில் மொத்தம் 5 பேர். நாங்கள் அனைவரும் உங்களுக்கே வாக்களித்தோம். மொத்தம் நீங்கள் எமக்கு தரவேண்டிய தொகை 75 லட்சம் !
வரும் சட்டமன்றத் தேர்தலில் உங்கள் கட்சி சார்பில் வெற்றி வேட்பாளராக எச்.ராஜா எங்கள் தி.நகரில் போட்டியிடுகிறார். நாங்கள் அனைவரும் அவருக்கே வாக்களிப்போம். இது உறுதி !
அவர் வேட்பாளராக அறிவிக்கப்பட்ட அடுத்த நொடியில் இருந்து அவருக்காக நான் பிரச்சாரம் செய்வதை என் முகநூல் நண்பர்கள் நன்கு அறிவார்கள் !
உடனடியாக கீழ்காணும் எனது வங்கிக் கணக்கில் ரூபாய் எழுபத்தைந்து லட்சத்தை சேர்க்கவும் ! இது அவசர வேண்டுகோள் அய்யா !
நல்லவேளை நான் விவசாயி இல்லை . பத்திரிகையாளன் . இந்தேரம் கடனுக்காக என் கை காலை முறித்திருப்பான் கோட்டக் மகிந்திரா வங்கி அடியாள் !
அய்யா ஒரே நேரத்தில் ஒட்டு மொத்த இந்தியர்களும் பணத்தை கேட்டால் என்ன செய்வீர்கள் ?
தயவுசெய்து உடனே பணத்தை பட்டுவாடா செய்யுங்கள் !
வரும் சட்டமன்றத் தேர்தல் பிரச்சாரத்திற்காக நீங்கள் சென்னை வரும்போது நமக்குள் கொடுக்கல் வாங்கல் பிரச்சனையே இருக்கக்கூடாது !
ஜெய்ஹிந்த்
ஸ்வச் பாரத்
ஆப் கி மோடி சர்கார்
நமஸ்கார்
தங்கள் உண்மையுள்ள
தாகம் செங்குட்டுவன்
ஆசிரியர்
தாகம்
இளைஞர் இதழ்
சென்னை - 600083
இணைப்பு - தலைக்கு பதினைந்து லட்சத்தை 100 நாளில் தாங்கள் தருவதாக உறுதி அளிக்கும் காணொலி.
குறிப்பு - ஜி இதுகுறித்து பலமுறை உங்கள் முகநூல் இன்பாக்சில் தகவல் அனுப்பியுள்ளேன்
.
முக்கிய குறிப்பு - அய்யா இக்கடிதத்தை பகிரும் என் நண்பர்கள் வங்கிக் கணக்கிலும் 1500000 செலுத்தவும் . அதன் மூலம் இரண்டு லாபம் ! ஒன்று எனக்கு கமிஷன் கிடைக்கும் ! இரண்டு நம் கட்சிக்கு டெபாசிட் கிடைக்கும் !

Post a Comment

Powered by Blogger.