Halloween party ideas 2015
.

வத்திக்கான் வானொலி செய்திகள்

 

செய்திகள்

12.03.16

------------------------------------------------------------------------------------------------------

 

1. திருத்தந்தை : சட்ட வழிமுறைகளை எளிதாக்கி, வாழ்வையும் எளிதாக்குங்கள்

 

2. போலந்து நாட்டில் திருத்தந்தையின் திருத்தூதுப் பயணம்

 

3. வியட்நாம் திரு அவையின் கல்வி பணி அக்கறை

 

4. சிரியாவில் அமைதி திரும்ப கத்தோலிக்க பிறரன்பு அமைப்பு அழைப்பு

 

5. தொழிலாளர்களுக்கென திருஅவையின் நூலகம்

 

6. பிரேசில் நாட்டில் இறையியல் பேராசிரியர் கொலை

 

7. தெற்கு சூடானில் நடப்பவை 'போர்க்குற்றங்களாக' அமையலாம்: ஐநா

 

------------------------------------------------------------------------------------------------------

 

1. திருத்தந்தை : சட்ட வழிமுறைகளை எளிதாக்கி, வாழ்வையும் எளிதாக்குங்கள்

 

மார்ச்,12,2016   அகில உலகத் திருஅவையின் நீதிமன்றமாக விளங்கும் 'ரோத்தா ரொமானா' (Rota Romana) அவையினால் ஏற்பாடு செய்யப்பட்ட பயிற்சியாளர் வகுப்பில் கலந்துகொண்டோரை இச்சனிக்கிழமையன்று காலை திருப்பீடத்தில் சந்தித்த திருத்தந்தை பிரான்சிஸ் அவர்கள், அண்மைக் காலங்களில் திருஅவையின் திருமணச்சட்டங்களில் முன்வைக்கப்பட்டுள்ள மாற்றங்கள் குறித்து எடுத்துரைத்தார்.

திருமணத்தை, செல்லுபடியாகாது என அறிவிக்கும் திருஅவையின் வழிமுறைகளால், பல தம்பதியர் சட்ட அமைப்பு முறைகளை அணுகமுடியாத நிலை இருப்பதையும், பலர் அருளடையாளங்களைப் பெறுவது குறித்த சந்தேகத்திலேயே வாழும் நிலைகள் நிலவுவதையும் தன் உரையில் எடுத்துரைத்த திருத்தந்தை பிரான்சிஸ் அவர்கள், இதனாலேயே, திருவையின் இந்த வழிகள் எளிதாக்கப்பட வேண்டும் என பரிந்துரைக்கப்பட்டதாக எடுத்துரைத்தார்.

சட்ட வழிமுறைகளால் துன்புறும் இம்மக்களின் நீதியான, நியாயமான, ஏக்கத்தை புரிந்துகொள்ளும் திருஅவை, பிறரன்பு மற்றும் இரக்கத்துடன், அவர்கள் அருகில் இருக்க ஆவல் கொள்கின்றது எனவும் 'ரோத்தா ரொமானா' அங்கத்தினர்களிடம் கூறிய திருத்தந்தை, தங்களின் திருமண நிலைப்பாடு குறித்து தெளிவாக அறிய விரும்பும் மக்களை, அதாவது, திருமண பந்தத்தில் பிரிவுறும் பிரச்சனைகளை எதிர்கொள்ளும் கிறிஸ்தவ தம்பதியரை, இரக்கத்துடன் அணுகுவதே புதிய பரிந்துரைகளின் நோக்கம் என்றார். திருமணம் செல்லுபடியாகாது என்பதற்கான திருஅவை சட்ட வழிமுறைகளின் பல்வேறு நிலைகளிலும் தீர்ப்பு உறுதிச்செய்யப்படவேண்டும் என்ற நிலைகளை மாற்றி, தற்போது, மறைமாவட்ட ஆயருக்கு முழு அதிகாரம் வழங்கப்பட்டிருப்பது, வழக்கில், காலதாமதத்தைக் குறைப்பதற்கான வழிமுறைகளுள் ஒன்று, எனவும் குறிப்பிட்டார் திருத்தந்தை.

பிரிந்து வாழும் குடும்பங்கள், இயல்பான வாழ்வை மேற்கொள்வதற்கு உதவும் நோக்கில், நீதியிலும் பிறரன்பிலுமான சேவைகள், அவர்களுக்கு திருஅவையின் திருமண சட்ட அமைப்பு முறைகளால் வழங்கப்பட வேண்டும் என்பதையும் வலியுறுத்தினார், திருத்தந்தை பிரான்சிஸ்.

 

ஆதாரம் : வத்திக்கான் வானொலி

 

2. போலந்து நாட்டில் திருத்தந்தையின் திருத்தூதுப் பயணம்

 

மார்ச்,12,2016. போலந்து நாட்டின் கிரகோவ் (Krakow) நகரில் நடைபெறவிருக்கும் உலக இளையோர் நாள் கொண்டாட்டங்களில் கலந்துகொள்ள, திருத்தந்தை பிரான்சிஸ் அவர்கள், வருகிற ஜூலை மாதம் 27ம் தேதி முதல், 31ம் தேதி முடிய அந்நாட்டிற்குத் திருத்தூதுப் பயணம் மேற்கொள்வார் என்ற செய்தி, இச்சனிக்கிழமை, அதிகாரப் பூர்வமாக அறிவிக்கப்பட்டது.

போலந்து நாட்டு அரசின் உயர்மட்ட அதிகாரிகள், மற்றும் அந்நாட்டின் ஆயர்கள் விடுத்துள்ள அழைப்பை ஏற்று, திருத்தந்தை பிரான்சிஸ் அவர்கள், இப்பயணத்தை மேற்கொள்கிறார் என்று, திருப்பீடச் செய்தித் தொடர்பகம் அறிவித்துள்ளது.

மேலும், மார்ச் 13, இஞ்ஞாயிறன்று, திருத்தந்தை பிரான்சிஸ் அவர்கள் தன் தலைமைப் பணியில் மூன்று ஆண்டுகளை நிறைவு செய்யும் வேளையில், அவர் புனித பேதுரு வளாகத்தில் வழங்கவிருக்கும் நண்பகல் மூவேளை செப உரைக்குப் பின்னர், அங்கு கூடியிருப்போருக்கு, 'இரக்கத்தின் நற்செய்தி' என்றழைக்கப்படும் லூக்கா நற்செய்தியின் கையடக்கப் பிரதி ஒன்று இலவசமாக வழங்கப்படும் என்று, திருத்தந்தையின் தர்மச் செயல்களை ஒருங்கிணைக்கும் துறை அறிவித்துள்ளது.

2014ம் ஆண்டு ஏப்ரல் 6ம் தேதியும், 2015ம் ஆண்டு மார்ச் 22ம் தேதியும், இதேவண்ணம், கையடக்க நற்செய்தி நூல்கள், புனித பேதுரு வளாகத்தில், நண்பகல் மூவேளை செப உரைக்குப் பின்னர் வழங்கப்பட்டன என்பது குறிப்பிடத் தக்கது.

 

ஆதாரம் : வத்திக்கான் வானொலி

 

3. வியட்நாம் திரு அவையின் கல்வி பணி அக்கறை

 

மார்ச்,12,2016 இளைய தலைமுறையினர், நாட்டிற்கும் திருஅவைக்கும் பயனுடையவர்களாக மாறும் நோக்கில், அவர்களுக்கு கல்வி வழங்குவது, தலத்திருஅவையின் முக்கிய மேய்ப்புப்பணி அக்கறையாக உள்ளது என, வியட்நாம் திருஅவை அறிவித்துள்ளது.

இளையோருக்கு கல்வி வழங்கி அவர்களை சிறந்த குடிமக்களாக உருவாக்குவதில் வியட்நாம் தலத்திருஅவை கவனம் செலுத்த விழைகிறது என உரைத்த அந்நாட்டு ஆயர் பேரவையின் கல்வி அவையின் பொதுச்செயலர் அருள்பணி Vincent Nguyen, அவர்கள், வியட்நாமின் கல்வி அமைப்புமுறை, அந்நாட்டின் கலாச்சார மதிப்பீடுகளை அடிப்படையாகக் கொண்டதாக அமைய வேண்டும் என அரசுக்கு அழைப்பு விடுத்தார்.

வியட்நாமில், கிராமப்புறங்களில் வாழும் இளையோருள் 50 விழுக்காடினர், உயர் கல்விக்குச் செல்வதில்லை, மற்றும் 4 விழுக்காடினரே பல்கலைக்கழக பட்டப் படிப்பை முடிக்கின்றனர் என்ற நிலையில், இத்தகையோருக்கு இலவசக் கல்வியையும், இலவச தங்கும் வசதிகளையும் வழங்கி உதவி வருகின்றது, தலத்திருஅவை.

 

ஆதாரம் : AsiaNews /வத்திக்கான் வானொலி

 

4. சிரியாவில் அமைதி திரும்ப கத்தோலிக்க பிறரன்பு அமைப்பு அழைப்பு

 

மார்ச்,12,2016 இரண்டரை இலட்சம் மக்களைப் பலிவாங்கி, 5 ஆண்டுகளாக, சிரியாவில் இடம்பெற்றுவரும் போரை முடிவுக்குக் கொண்டுவர, அனைத்துத் தரப்பினரும் முன்வரவேண்டும் என CAFOD என்ற கத்தோலிக்க பிறரன்பு அமைப்பு, அழைப்பு விடுத்துள்ளது.

1 கோடிக்கும் மேற்பட்ட மக்கள் தங்கள் சொந்த வீடுகளிலிருந்து அகதிகளாக வெளியேறியுள்ள நிலையில், அவர்களுக்கு உணவு உதவிகளை வழங்கவேண்டும் என்ற நோக்கிலாவது, அமைதி திரும்புவது அவசியம் என CAFOD அமைப்பு விண்ணப்பித்துள்ளது.

நாட்டின் கட்டுமான அமைப்பு முறைகள், பொருளாதாரம், நீர் ஆதாரம், மின்சாரம் போன்றவை மட்டுமல்ல, வருங்கால தலைமுறையின் கல்வியும் சிரியாவில் பெருமளவில் பாதிக்கப்பட்டுள்ளது என, தன் கவலையை வெளியிட்டுள்ளது கத்தோலிக்க உதவி அமைப்பான CAFOD.

 

ஆதாரம் : IndCathNews/வத்திக்கான் வானொலி

 

5. தொழிலாளர்களுக்கென திருஅவையின் நூலகம்

 

மார்ச்,12,2016   மக்களுக்கான சமூகப் பணிகளின் ஒரு பகுதியாக, தொழிலாளர்களுக்கென நூலகம் ஒன்றை திறந்துள்ளது, கம்போடிய தலத்திருஅவை.

Phnom Penh நகரின் தொழிலாளர் குடியிருப்பின் நடுவே இந்த நூலகத்தைத் திறந்து வைப்பதன் வழியாக, தொழிலாளர்களின் வாசிப்பு தாகத்திற்கு உதவ முடியும் என தலத்திருஅவை அதிகாரிகள் தெரிவித்தனர்.

நூலகத்தைத் திறந்துள்ளதன் வழியே, தொழிலாளர்களும் அவர்களின் குழந்தைகளும் தங்கள் நேரத்தை நல்ல முறையில் செலவிட உதவ முடியும் என, இந்நூலகத்திற்கு தலைவராக நியமிக்கப்பட்டுள்ள Francois Sede Ric என்பவர் தெரிவித்தார்.

பிரான்ஸ் நாட்டின் உதவி அமைப்பு ஒன்றின் வழியே இந்நூலகம் நிறுவப்பட்டுள்ளது.

 

ஆதாரம் : UCAN /வத்திக்கான் வானொலி

 

6. பிரேசில் நாட்டில் இறையியல் பேராசிரியர் கொலை

 

மார்ச்,12,2016. பிரேசில் நாட்டில், நன்னெறி இறையியல் பேராசிரியராகப் பணியாற்றி ஓய்வுபெற்ற 75 வயது நிரம்பிய அருள் பணியாளர் ஒருவர், அடையாளம் தெரியாத மனிதர்களால் சுட்டுக் கொல்லப்பட்டுள்ளார்.

பிரேசில் நாட்டின் பெத்ரோபோலிஸ் (Petropolis) பிரான்சிஸ்கன் இறையியல் நிறுவனத்தில் பேராசிரியராகப் பணியாற்றி ஓய்வுபெற்றபின், கத்தோலிக்க வெளியீட்டுக் கழகத்தின் தலைவராகப் பணியாற்றிவந்த அந்நாட்டு அருள் பணியாளர், அந்தோனியோ மோசெர் (Antonio Moser) அவர்கள், தன் வாகனத்தை ஓட்டிச் சென்றபோது, அவரை, மோட்டார் சைக்கிளில் பின்தொடர்ந்த இருவர், துப்பாக்கியால் சுட்டுக் கொன்றுள்ளனர்.

பிரான்சிஸ்கன் துறவியான அருள்பணி மோசெர் அவர்களிடம் கொள்ளையடிக்க மேற்கொள்ளப்பட்ட முயற்சியின்போது, அவர் சுட்டுக் கொல்லப்பட்டுள்ளார் என்று காவல்துறை அறிவித்துள்ளது.

 

ஆதாரம் : வத்திக்கான் வானொலி

 

7. தெற்கு சூடானில் நடப்பவை 'போர்க்குற்றங்களாக' அமையலாம்: ஐநா

 

மார்ச்,12,2016 தெற்கு சூடானில் இடம்பெறும் வன்முறைகள், போர்க் குற்றங்களாகவும், மனித குலத்துக்கு எதிரான குற்றங்களாகவும் அமையக்கூடும் என்று ஐநாவின் மனித உரிமைக் கண்காணிப்பாளர்கள் கூறியுள்ளனர்.

பொதுமக்களை இலக்கு வைத்து கொல்வது, மற்றும் பாலியல் வல்லுறவை போர் ஆயுதமாக பயன்படுத்துவது உள்ளிட்ட, மிகவும் கொடூரமான போர்க் கொள்கையை தெற்கு சூடானிய அரசாங்கம் மேற்கொண்டிருப்பதாக, ஐநாவின் அறிக்கை ஒன்று குற்றஞ்சாட்டுகின்றது.

தெற்கு சூடானில், கடந்த 2013ம் ஆண்டு உள்நாட்டுப் போர் துவங்கியதிலிருந்து பல்லாயிரக்கணக்கான மக்கள் கொல்லப்பட்டிருப்பதாக ஐநா மதிப்பிட்டுள்ளது.

கடந்த அக்டோபரில் அரசு படைகள், அறுபதுக்கும் அதிகமான ஆண்களையும் சிறுவர்களையும் கப்பல் கொள்கலன் ஒன்றில் அடைத்து, மூச்சுத் திணறடிக்கச் செய்து கொன்றுவிட்டதாக, அம்னெஸ்டி இண்டர்நேஷனல் மனித உரிமைகள் அமைப்பு குற்றஞ்சாட்டியிருந்தது குறிப்பிடத்தக்கது.

 

ஆதாரம் : BBC/வத்திக்கான் வானொலி

 

இது இரக்கத்தின் காலம்...

 

மன்னிப்பதில் கடவுள் சலிப்படைவதில்லை

 

2013ம் ஆண்டு, மார்ச் 13ம் தேதி, திருஅவையின் தலைவராக திருத்தந்தை பிரான்சிஸ் அவர்கள் பொறுப்பேற்றார். அவர் தலைமைப் பொறுப்புக்கு தெரிவு செய்யப்பட்ட மூன்றாம் ஆண்டு, இஞ்ஞாயிறன்று நிறைவுறுகிறது. தலைமைப் பொறுப்பேற்ற பின், திருத்தந்தை பிரான்சிஸ் அவர்கள், மார்ச் 17, ஞாயிறன்று, புனித பேதுரு வளாகத்தில், முதல் முறையாக, நண்பகல் மூவேளை செப உரையை வழங்க வந்தார். அன்று, இஞ்ஞாயிறைப்போல், விபச்சாரத்தில் பிடிபட்ட பெண்ணை இயேசு மன்னித்த நிகழ்வு, நற்செய்தியாக அமைந்தது. மன்னிப்பை மையப்படுத்தி, அன்று, திருத்தந்தை வழங்கிய உரையிலிருந்து சில எண்ணங்கள் இதோ:

"விபச்சாரத்தில் பிடிபட்ட பெண்ணை, இயேசு, சாவுக்குத் தீர்ப்பிட வேண்டும் என்று மறைநூல் அறிஞர்கள் விரும்பினர். அந்த மரண தண்டனையிலிருந்து இயேசு அப்பெண்ணைக் காப்பாற்றினார். அவரிடமிருந்து எந்த ஒரு கடுமையான சொல்லும் வரவில்லை; மாறாக, இரக்கம், அன்பு இவையே அவரிடமிருந்து வெளிப்பட்டன.

இறைவனின் இரக்கத்தை, பொறுமையைப் பற்றி நீங்கள் சிந்தித்தது உண்டா? அவரது பொறுமைக்கு அளவே இல்லை. இதை நாம் மறந்துவிடக் கூடாது: மன்னிப்பதில் கடவுள் சலிப்படைவதேயில்லை. மன்னிப்பு கேட்பதில் நாம்தான் சலிப்படைந்து விடுகிறோம்."

திருத்தந்தை பிரான்சிஸ் அவர்கள், தன் தலைமைப் பணிக்கெனத் தேர்ந்த விருதுவாக்கில் (miserando atque eligendo - இரக்கம் கொண்டு தேர்ந்தெடுத்து) 'இரக்கம்' என்ற சொல் இடம்பெற்று்ள்ளது. அதற்கேற்ப, அவர் ஆற்றிவரும் பணிகளில், இரக்கம் முதலிடம் பெற்றுள்ளது என்பதை நாம் அனைவரும் அறிவோம். இரக்கத்தின் சிறப்பு யூபிலி ஆண்டையும், அவரது பணிவாழ்வின் மூன்றாம் ஆண்டு நிறைவையும் கொண்டாடும் இவ்வேளையில், இறைவன், தன் இரக்கத்தால், திருத்தந்தை பிரான்சிஸ் அவர்களுக்கு நல்ல உடல் நலத்தை வழங்கவேண்டும் என்று மன்றாடுவோம்.

 

ஆதாரம் : வத்திக்கான் வானொலி

 

 




--
தமிழ் தேடுப்பொறி மேம்படுத்தப்படுதல் குழு

SEO/SMO Team

Post a Comment

Powered by Blogger.