Halloween party ideas 2015
.

காலம் தந்த கொடுமையின் விளைவாக சுவரிழந்த சித்திரங்களாய் வாழ்ந்துகொண்டிருக்கும் மானத்தமிழ் மறவரின் கண்ணீர்க் கதைகளை, வறுமையின் வடுக்களை ஆவணப் பதிவிடல் மூலம் உலகுக்கு கோடிட்டுக்காட்ட விளைகின்றோம். விளைநிலங்களாய் வாழ்ந்தவர்கள் தரிசு நிலங்களாய், அன்றாட வாழ்விற்கே அல்லலுறுபவர்களாய் வாழும் கொடூர நிந்தையை என்னவென்று சொல்வது? 

அந்த வகையில் நாம் தரும் முதல் விழுது,
ரதீஸ்வரன் கயல்விழி.

இவள், மீன் பாடும் தேன் நாடாம் மட்டக்களப்பிலே பிறந்து வன்னி மண்ணில் வாழ்ந்து இழப்புகளின் பின் மீண்டும் சித்தாண்டி என்னும் தனது சொந்த மண்ணிலே வாழ்ந்துகொண்டிருக்கின்றாள். என்றால், வாழ்வதற்கு வாழ்க்கையால் நிர்ப்பந்திக்கப்பட்டிருக்கின்றாள்.

1989 இல் இந்திய இராணுவத்தின் உயிர்ப் பலியில் தந்தையை இழந்துவிட்டாள் கயல்விழி. இவளது பிஞ்சுநெஞ்சிலே ஆறாமல் பதிந்துபோனது அந்த வடு. கால ஓட்டத்தில் அவளும் வளர்ந்து விட்டாள். பள்ளிப் பருவத்தின் பட்டாம் பூச்சியாய் வாழ்ந்த காலத்தில், போர்க்கோலம் சூழ்ந்த தேசத்தின் அவலம் கண்டு புறப்பட்டவர்களில் இவளும் ஒருத்தி. பாசத்திற்குள் அடங்கிருந்த கயல்விழியின் சிந்தனைகள் தேசத்திற்காய் மாறிப்போனது. பதினைந்து வயதிலேயே போராட்டம் நோக்கிப் புறப்பட்டு விட்டாள்.

கொட்டும் போரும் குட்டிச் சண்டையும் குதூகல வாழ்வுமாய் ஆர்ப்பரித்த இவள், பதினாறாவது வயதிலேயே தனது தலையின் வலது பக்கத்தில் குண்டை ஏற்று இடது பக்க கைகால்களின் உணர்வினை இழந்தாள். கொட்டமடித்த அந்தக் குட்டிப்புறா வார்த்தைகளுக்குள் மட்டும் அடங்கிக்கொண்டது. சோகச் சுமையுடன் அவள் வாழ்ந்தது சில நாட்களே தான். தேனகத்தில் கணினிப் பணிசெய்யும் போராளியாய் கடமை ஏற்றாள். கானலான காலத்தையும் கலகலப்பாக மாற்றிக்கொண்டவள் இவள்.

இவளது கலகலப்புத்தான் பலரையும் இவள் பால் ஈர்த்தது. வாழும் காலமெல்லாம் அவளது கலகலப்பைச் சொந்தமாக்கிக்கொள்ள எண்ணியது ஒரு ஜீவன். அவ்வேளை தான் வந்தாறுமூலைப் பல்கலைக்கழக பேராசிரியராக இருந்து போராளியான ரதீஸ்வரன் (செஞ்சுடர்) என்பவரைச் சந்தித்தாள். இவளது வாழ்விலும் பூச்சொரிந்தது. மட்டிலிருந்து வன்னிநோக்கிய பயணத்தில் இருவருமே புறப்பட்டனர்.

பத்து வருட கால சுகமான போர்க்காலக் காத்திருப்பின் பின் வீரத்தின் விழுதொன்று இவளுக்கும் வாழ்வு தந்தது. ரதீஸ்வரன் இவளைக் கரம்பற்றிக்கொண்டார். மாற்றுத் திறனாளி ஒருவருக்கு வாழ்வு கொடுக்கவேண்டும் என்ற செஞ்சுடர் மாஸ்ரரின் பரந்த சிந்தனையே கயல்விழிக்கு இனியதொரு இல்லறத்தை அமைத்துக்கொடுத்தது. இரண்டே ஆண்டுகள் மகிழ்வான இல்லறம். கலகலப்பாய் வாழ்ந்தனர் கிளிநொச்சியில். போரின் கோரம் காவுகொண்டது கயல்விழியின் கணவரை.

நினைத்து நினைத்து அழுவதற்கும் நினைத்து மகிழ்வதற்கும் அவளுக்கு கிடைத்தது அந்த இரண்டே ஆண்டுகள் தான். அவள் கொடுத்துவைத்தது அவ்வளவு தான். சுதந்திரபுரம் மண்ணிலே தேசத்தின் வீரமகனாய் அவர் காவியம் படைத்திட இரணைப்பாலையில் புதைத்துவிட்டு தன்னந்தனியே வாழ்வதனை வாழத்தெரியாது தடுமாறி நின்றாள். மீண்டும் அவளை ஆதரவாய் அணைத்துக்கொண்டது நவம் அறிவுக்கூடம். கொட்டிய குண்டு மழையில் நட்புக்கள் காட்டிய பரிவின் நூலிளையைப் பற்றிப்பிடித்து பம்பைமடுவில் புனர்வாழ்வுபெற்று ஒருவாறு தாயிடம் தஞ்சம் புகுந்தாள். இன்றும் தாய்க்கு குழந்தையாய் வாழ்ந்து கொண்டிருக்கின்றாள். தன் தேவைகளை மட்டுமன்றி மகளின் தேவைகளையும் கவனிக்கவேண்டிய பாரிய பொறுப்பை சுமந்துகொண்டிருக்கிறார் கயல்விழியின் அம்மா. சாப்பிட்ட நாள் பாதி, சாப்பிடாத நாள் பாதியாய் நாட்கள் நகர்கின்றன. சித்தாண்டிச் சந்தியில் இருந்து மிகத்தொலைவில் இவளது வீடு. நடக்கவே முடியாத இவள் வாழ்க்கைக்கு எப்படி வழிதேடுவது?

வீட்டுத்திட்டம் ஒன்று கொடுக்கப்பட்டது என்னவோ உண்மைதான். தலைக்கு மேல் வந்த கூரை தலைக்கு மேல் கடனையும் சுமத்திச்சென்ற கொடுமையை யாரிடம் சொல்ல? கிணறு, மலசலகூடம் கூட அடுத்த வீட்டில் பயன்படுத்தவேண்டிய துர்ப்பாக்கியமான வாழ்வு இவளுக்கு, பெற்ற தந்தை இல்லை, ஆதரவாய் கரம் பற்றிய கணவனும் இல்லை. சொல்லிக்கொள்ளும்படியாய் தாங்கிக்கொள்ள உறவுகளும் இல்லை.

ஈழதேசத்திற்காய் இளமையைத் தொலைத்த இவள் வாழ வழியின்றித் தவிக்கின்றாள். வறுமையின் கோரக் கரங்கள் இவளது வாழ்வை நசிக்கின்றன.. என்றோ ஒரு நாள் விடியும் என்ற நம்பிக்கையில, இவளும் வாழ்கின்றாள், வாழ்ந்து கொண்டிருக்கின்றாள்.

இந்த உறவுக்கு உதவ முன்வருவோருக்கு நேரடியாக தொடர்பு கொடுக்கப்படும்.
 
தொடர்புக்கு : ராம்
தொலைபேசி இலக்கம்: 00447448452286

source: ttnnews.com

Post a Comment

Powered by Blogger.