Halloween party ideas 2015

Image result for i have a dreamஎன்றும் கலையாத கனவு ஒன்று (எனக்கு ஒரு கனவு உள்ளது)
-----------------------------------------------------------------------------------------------------------
                                                                                                                 ச.ச.முத்து

பொதுவாகவே கனவுகள்கலையும்போது தூக்கமும் கலைவதுதான் இயல்பு-வழமை.
ஆனால் ஐம்பதுஆண்டுகளுக்கு முன்னர் (1963 ஓகஸ்ட்28) ஒரு மனிதன் தனது கனவு பற்றி சொன்னபோது
மனிதஇனத்தின் நீண்டதூக்கத்தை,ஆழ்ந்து உறைந்த மௌனத்தை அந்த கனவு கலைத்தது ஒரு சரித்திர நிகழ்வாகும்.
 1963ம்ஆண்டு ஓகஸ்ட்மாதம் 28ம்நாள் வொசிங்டனின் ஆப்ரகாம்லிங்கன் நினைவுமண்டபத்தின் படிக்கட்டுகளின் மேல் ஏறிநின்று லட்சோபலட்சம் மக்கள் முன்னால் மார்ட்டின் லூதர்கிங் ஆற்றிய நீண்டஉரையும் அதனூடாக அவர் சொன்ன    " I Have A Dream"என்ற வாக்கியமும் பிரகடனமும் அதுவரை வெறும் அரசியலமைப்பு வார்த்தைகளுக்குள்ளும் சட்டசொற்களுக்குள்ளும் இருந்துவந்த ஆணவத்தை உடைத்து நொறுக்கிவிட்டு போய் இருந்தது.

பல லட்சம்கோடி மக்களின் கனவை மார்ட்டின் லூதர்கிங் தனது கனவாக அன்று பிரகடனம் செய்திருந்தார்.
மார்ட்டின் லூதர் கிங் என்ற மானுடஉரிமைப்போராளி,விடுதலைப்போ
ராளியின் வாழ்வு வெறும் 39 ஆண்டுகளுக்குள் முடிவடைந்து போயிருந்தாலும் ஐம்பதுஆண்டுகளுக்கு முன்னர் அவர் நிகழ்த்திய என்ற இந்த உரையின் தாக்கம் இன்னும் சிலநூற்றாண்டுகளுக்காவது நிச்சயம் தொடரும் என்பது வரலாற்று உறுதி.
நிறம்பார்த்து மனிதரை ஒதுக்கியும் தள்ளியும் அடக்கியும் வைத்திருந்த சமூகக்கொடுமைகளுக்கு எதிராகவும்,தொழிலாளர்களின் உரிமைகளுக்காகவும், தொடர்ச்சியான போராட்டங்களிலும் விழிப்புணர்வை ஏற'படுத்த வேண்டி நீண்டநடைப்பயணங்களிலும் தன் வாழ்வின் இறுதிநாள்வரைக்கும் உழைத்தவர் மார்ட்டின் லூதர்கிங்.
அவருடைய உரை என்பது வெறுமனே வார்த்தை ஜோடிப்புகளோ வசனப்பசப்புகளோ அல்லாமல் சத்தியமான செயற்பாடுகளுக்குள்ளான போராட்டங்களை நடாத்திய ஒரு மனிதனின் அடிமனதின் கனவு என்ற வகையில் அது எல்லோர் மனங்களையும் பற்றிக்கொண்டது.
எங்கெங்கு மனிதஉரிமைகள் மறுக்கப்பட்டு மானுடம்மறுதலிக்கப்பட்டதோ அங்கெல்லாம் மார்ட்டின்லூதர் கிங்கின் எதிர்ப்பும் குரலும் தோழனாக உடன்சென்றது.வியட்னாமின் விடுதலைக்கு எதிராக அமைரிக்கா நடாத்திய கொடும்போரை எந்தவித சமரசமுமின்றி எதிர்த்தவர் மார்ட்டின்லூதர் கிங்.
'வெள்ளையருடன் ஒரே பாடசாலையில் ஒன்றாக அமர்ந்து கல்வி கற்கும் உரிமை மறுக்கப்பட்ட கறுப்புமனிதர்களும்,வெள்ளையர்களு
ம் ஒரே தேசத்துக்காக வியட்னாமில் ஒன்றாக மடிவதன்' அவலத்தை மிகதெளிவாக புரிந்து அதற்கு ஏதிராக குரல்கொடுத்தவர் மார்ட்டின் லூர்த கிங்.
(we have been repeatedly faced With the cruel irony of  wathching  Negro and  white  boys  on TV  screens as They kill and die together for a nation that  has been unable to seat  them  in the Same  schools' –martin Luther king)
எல்லாவற்றிற்கும் மேலாக அவருடைய ஓகஸ்ட்28 பிரகடனம்(உரை) தனித்து அமெரிக்க கறுக்குநிற மக்களுக்கு மட்டும் பொருந்தக்கூடியது அல்ல.இன்றும் இனி வரும்காலங்களிலும் விடுதலைதேடும் அனைத்து மக்களுக்கும் அது பொருந்தும்.
வறுமைக்குள்ளும்,பட்டினிக்குள்ளு
ம் வாழ்வுமுடங்கிப்போன அனைத்து மனிதருக்குக்கும் அது ஒரு புதிய வீச்சை தரக்கூடியது.
உலகவரலாற்றில் என்றும் பதியப்பட்டுள்ள உரைகளுக்குள் மிகவும் ஆளுமைமிக்கது இந்த மனிதனின் 'எனக்கு ஒரு கனவு இருக்கிறது' உரை.
கனவுகளில் தீப்பிடிக்க வைத்தவனுக்கு என் கவிதை ஒன்று கீழே

கனவு மெய்ப்படும்....
---------------------------------------------------
                              
                                                            

அதி குளிரும் மிக வெப்பமும்
இல்லாத காலமொன்றின் நாளில்
திசைகளதிர எழுந்தது அந்த குரல்.
'எனக்கு ஒரு கனவு உள்ளது'.( I HAVE A DREAM)
நீள்துயில் கலைந்தெழுந்த
கறுப்புமனிதன் ஒருவனின்
கனவுகளின் தொகுப்பு அது.

மற்றைய எல்லோருமே
சுகங்களுக்கான கனவுகளுக்குள்
ஆழ்ந்து துயில் கொண்டிருந்தபோதில்
இவன் மட்டுமே
உன்னதமான சுதந்திரத்துக்கான
கனவொன்றை சொன்னவன்.

தொலைந்துபோன வாழ்வுகளை
கனவுகளுக்குள் எல்லோரும்
தேடி அலைந்து கொண்டிருந்த பொழுதில்
இவன்மட்டும் விடுதலைவாழ்வுக்கான
கனவொன்றை கண்டவன்-(எனக்கு ஒரு கனவு உள்ளது).

1963 ஓகஸ்ட்28ம் நாளில்
வொசிங்டன் நகரத்து
ஆப்பிரகாம் லிங்கன் நினைவிடத்து
படிக்கட்டுகளில் ஏறிநின்று
இவன் ஓங்கிக் கொடுத்த குரல்
பக்கத்தில் இருந்த வெள்ளைமாளிகையின்
நிறவாத சுவர்களை ஒருகணம் அசைத்திருக்கும்-ஐயம் இல்லை.

மார்ட்டின் லூதர் கிங்
நிறங்களால் பிரிக்கப்பட்ட
பள்ளத்தாக்குகள் சமனிடப்படவேண்டிய
கனவொன்றை உரத்து சொன்ன போராளி நீ.
ஜோர்ஜிய மாநிலத்து செம்மலைகளின் மீது
முன்னொரு காலத்தைய அடிமைகளின் பிள்ளைகளும்
எஜமானர்களின் பிள்ளைகளும் ஒருநாளில்
ஒரு மேசையில் ஒன்றாக அமர்ந்துபேசும்
காலம் ஒன்றை கனவு கண்டவன் நீயே.

உன்னுடைய கனவுகள் அனைத்தும்
கைவராது போகினும் இப்போது
வெள்ளைமாளிகையின் ஓவல்மண்டபத்துள்
ஒரு கறுப்புமனிதன் அமர்ந்திருக்கும்
சாத்தியம் ஒன்றை கைவரப் பெற்றுள்ளது.

இதோ மார்ட்டின்லூதர் கிங்,
எனக்கு ஒரு கனவு உண்டென்ற
உன் வார்த்தைகளை கேட்கும்போதெல்லாம்
என் தேசத்து புதல்வர் ஒவ்வொரின்
கனவுகளும் கண்முன்னே விரிகின்றது.
உன் கனவும் எம் கனவுகளும்
ஒன்றுதான் சகோதரனே- விடுதலைக்கான பெருங்கனவு.

எப்போதும் எங்கள் முதுகுமேல் ஏறிநின்று
எம்மை ஆட்சிசெய்யும் ஆதிக்ககனவு
கலைந்துபோகும் ஒரு நாளினில்தான்
எங்கள்கனவும் உன் கனவும் சத்தியமாகும்.
சாத்தியமும் ஆகும் காண்
கனவு மெய்ப்பட்டே தீரும் ஒருநாள்.
வெளிச்சம் எங்கும் நிறையும்வரைக்கும்
முற்றாக இருள் விலகும்வரைக்கும்
விடுதலையே எங்கும் விரியும்வரைக்கும்
உன் கனவு தொடரும்.
எங்களின் கனவும்தான்.
                                                -     ச.ச.முத்து-







இத்தாலியில் திடீரென நேர்ந்த பெரிய பூகம்பம்

 
Earthquake Location 2016 August
 
 
Image 2016 Aug
 
 சி. ஜெயபாரதன் B.E.(Hons) P.Eng (Nuclear), கனடா
 
++++++++++++++++
 
 
 
 
+++++++++++++++
 
Cover Page Image
பூமித்தாய் குலுக்கித்
தோள சைத்தாள் ! இடிந்து
தாமாக வீழ்ந்தன
மாளிகைகள் !
தரை மட்ட மாகின
கட்டடங்கள் !
சட்டென மக்கள்
சடலமாய்ப்  புதைந்தார் !
கடற்தட்டு கால் உதைத்தால்
படை யெடுக்கும் சுனாமி அலைகள்  !
அடித்தட்டு தொடை அசைந்தால்
இடித்திடும் அதிர்வுகள் !
நிலம்நடுங்கி
நடனமிடும்  புவித்தளம் !
குடற் தட்டு கூத்தாடி
உடல் நடுங்கும், உயிர் நசுங்கும் !
நிலையாமை மெய்யாகும் !
 
++++++++++++++++
 
Image 2016 Aug -1
 
Image 2016 Aug -2
 

எங்கெங்கு வாழினும்
இன்ன லப்பா !
ஏழு பிறப்பிலும்
தொல்லை யப்பா !
மனிதப் பிறவிக்குப்
பாதுகாப்பு நாடு
ஏதுவும்
இல்லை யப்பா  !
சூழ்வெளி மட்டும்
மாசோ  டில்லை யப்பா !
ஆழ்ந்த பூமிக் குள்ளும்
ஊழல் மண்டி
ஊர்ந்து செல்லும்
புற்று நோய்க ளப்பா !
ஊழிக் கூத்தின்
பிரளயக் கோரம் உலகெங்கும்
அரங்கே றுதப்பா !

+++++++++

 
Image 2016 Aug -3
 
Image 2016 Aug -4
 

"பூமியின் நிலப்பரப்புப் பகுதிகள் அனைத்தும் பல பில்லியன் ஆண்டுகளுக்கு முன்பு ஒருங்கிணைந்த மாபெரும் ஒற்றைக் கண்டமாக இருந்தது !  பல மில்லியன் ஆண்டுகள் கழித்து, எப்படியோ அப்பெருங் கண்டம் பிளவுபட்டு வெவ்வேறு பகுதிகளாகப் பிரிந்து, தற்போதுள்ள இடங்களுக்கு அவை நிலப்பெயர்ச்சி ஆகியுள்ளன!  பூகோளத்தின் அடித்தட்டுகள் [Crusts] பூமியின் உட்கருக் கனல் குழம்பில் [Liquid Core] மிதந்து மெதுவாக நிலப் பெயர்ச்சி அடைகின்றன!  கண்டங்களின் நிலப் பெயர்ச்சிக்கும், அடித்தட்டுப் பிறழ்ச்சிக்கும் [Continental Drift & Plate Tectonics] பூர்வப்படிவப் பதிவுகள் [Fossil Records] சான்றுகள் காட்டி நிரூபணமும் அளிக்கின்றன".

டாக்டர் ஆல்ஃபிரெட் வெஜினர், ஜெர்மன் பூதளவாதி [Dr. Alfred Wegener (1880-1930)]

 
 
Image 2016 Aug -5
 
Image 2016 Aug -6
 

உலுக்கிச் செல்லும் ஊழியின் கை
உலுக்கி உலுக்கி மேற்செல்லும் !
அழுதாலும், தொழுதாலும் அயராது அதன் கரம் !
உலுக்கி உலுக்கி மீண்டும் உலுக்க வரும் !

புதிய உமர் கையாம்

 
Image 2016 Aug -7
Image 2016 Aug -8
 
 

இத்தாலில் அடுத்தோர் பயங்கரப் பூகம்பம் 

2016 ஆகஸ்டு 24 ஆம் தேதி நள்ளிரவில் மக்கள் தூங்கிக் கொண்டுள்ள போது, திடீரெனப் பெரும் பூகம்பம் 6.2 ரிக்டர் மதிப்பளவில் உலுக்கியது. அதைத் தொடர்ந்து சுமார் 470 தொடர் அதிர்ச்சிகள் பின் தொடர்ந்தன ! அதில் ஒன்று 5.1 ரிக்டர் மதிப்பளவு.  இன்றுவரை [ஆகஸ்டு 25] மாண்டவர் எண்ணிக்கை: 247, காயமுற்றோர் எண்ணிக்கை: 368.  இத்தாலியின் பல வீடுகள் பழையவை.  1500 ஆண்டுகளில் செங்கல் சுண்ணாம்பில் கட்டப் பட்டவை.  தரை மட்டமான பல வீடுகளின் சிதைவிலிருந்து, சிக்கிய மாந்தரைத் தேடி எடுப்பது, வைக்கோல் பொதியில் காணாமல் போன ஊசியைத் தேடுவதை ஒப்பதாகும்.  தீயணைப்புப் படையினர், உதவிப் பணியாளர் யந்திர சாதனங்களுடன் தோண்டி உயிருள்ளோரை எடுப்பதும், உயிரற்ற உடல்களை மீட்பதும் இமாலயச் சாதனைகளே !  பூகம்பம் நேர்ந்து சிதைவுகள் மிகுந்த இடம் ரோமா புரிக்கு வட கிழக்கில் 100 கி.மீ.[60 மைல்] உள்ள அமாடிரிஸ் [Amatrice] நகரம். கடந்த 1000 ஆண்டுகளாக சுமார் 70 பெரிய பூகம்பங்கள் இத்தாலி நாட்டில் எழுந்துள்ளன.  ஐரோப்பிய நாடுகளில் இத்தாலி நாடே பேரளவு பூகம்ப விளைவு நாடாகக் கருதப் படுகிறது. உலக நாடுகளில் ஜப்பான் தீவுகளுக்கு அடுத்த பூகம்பச் சிதைவு நாடாக இத்தாலி அறியப் படுகிறது.

Image 2016 Aug -9

2009 இல் அமாடிரிஸுக்கு அருகில் லகுயில்லாவில்  [L'Aquila] நேர்ந்த நில நடுக்க விளைவுகளிலிருந்து, மக்கள் இன்னும் மீளாத போது, இப்போது அடுத்தோர் பயங்கர பூகம்பம் பேரழிவை உண்டாக்கி உள்ளது. பல்லாயிரம் பேர் இல்லம் இழந்து, புலம்பெயர்ந்து தற்காலிகக் கூடாரங்களில் தங்க நேரிட்டது.  உடனே சுமார் 1200 நபருக்கு இடவசதி செய்ய நேரிட்டது. இவர்கள் ஒருசில மணி நேரங்களில் எல்லாம் இழந்தபோன எளியவர். இவருக்கு செஞ்சிலுவைப் பணியாளர், [Red Cross Helpers] அரசாங்க ஊழியர் உண்ண உணவு, குடிநீர், மருத்துவ வசதிகள் அளித்து வருகிறார்கள். இந்த மாதிரிப் பெரிய இயற்கைப் பேரிடர்களுக்கு, உலகில் எந்த நாடும் அபாயப் பாதுகாப்புச் சாதனச் சேமிப்புகளும், தேவையான நிதித் தொகையும் சேர்த்து வைத்திருப்பதில்லை.  அண்டை நாடுகளும், உலகப் பெரும் வல்லரசுகளும் முன்வந்து உதவி செய்ய வேண்டும்.

++++++++++++++++++++++


fig-1c-earthquake-death-zones1


இத்தாலிய நாட்டின் மத்தியப் பகுதியில் மாபெரும் பூகம்பம்

2009 ஏப்ரல் 6 ஆம் தேதி மத்திய இத்தாலியில் ரோமாபுரிக்கு 60 மைல் (100 கி.மீ) தூரத்தில் உள்ள லாகுயிலா (L'Aquila) என்னும் நகரில் (5.8 – 6.3) ரிக்டர் அளவுப் பூகம்ப அதிர்ச்சிகள் நள்ளிரவில் ஏற்பட்டுக் கட்டடங்கள் தகர்ந்து தூங்கிக் கொண்டிருத்த மக்கள் பலர் மீண்டும் எழ முடியாமல் மாண்டு போயினர் !  இல்லங்களை இழந்தோர் 28,000 (?) பேர் என்றும் 18,000 பேர் தற்காலியக் கூடாரங்களில் குடியுள்ளார் என்றும் சுமார் 10,000 பேர் கடற்புற விடுதிகளில் தங்கி இருக்கிறார் என்று அறியப்படுகிறது.  இறந்தவர் எண்ணிக்கை 280 (ஏப்ரல் 9) என்றும், காண இயலாமல் இன்னும் தகர்ந்த கட்டடங் களுக்குள் புதைந்து போனர் எத்தனை பேர் என்றும் யூகிக்க முடியாத நிலையில் தர்ம சங்கடமாய் இருந்து வருகிறது !  மாண்டவரில் பெரும்பாலோர் 13 ஆம் நூற்றாண்டு மலைச்சிகர நகரமான லாகுயிலா பகுதியைச் (ஜனத்தொகை : 70,000) சேர்ந்தவர்கள்.

fig-1-italian-earthquake-scenes

இடிந்த இல்லங்களின் எண்ணிக்கை 3000 முதல் 10,000 வரை இருக்கலாம்  ! காயமடைந்தோர் எண்ணிக்கைச் சுமார் 1500 என்று கணிக்கப் படுகிறது.  முப்பது ஆண்டுகளுக்குப் பிறகு தாக்கிய இந்த பூகம்பத்தால் பல்வேறு இல்லங்கள், மாளிகைகள், சரித்திரப் புகழ் பெற்ற கிறித்துவ ஆலயங்கள் பல இடிந்து வீழ்ந்தன.  இத்தாலியப் பிரதம மந்திரி சில்வியோ பெர்லுஸ்கோனி (Sivio Berlusconi) 2009 நிதிமுடக்கக் காலத்து நெருக்கடி யால் அபாயத் தேவைக்குப் பணக்கடன் தேடி அலைந்தார் !  இத்தாலியின் மற்ற இடங்களில் பணிபுரியும் மருத்துவ டாக்டர்களும் பணிப்பெண் நர்ஸ்களும் லாகுயிலா நகர்ப் பகுதிக்கு அழைக்கப் பட்டார் !  அதே சமயம் அவரது அரசாங்கம் பெயர்ச்சி அடைந்த மக்கள் நிவாரணப் பணிகளுக்கு 30 மில்லியன் ஈரோ உதவி நிதியை (40.6 மில்லியன் டாலர்) அளிக்கும் என்றும் அறிவித்தார்.  அத்தோடு பாதிக்கப்பட்ட பகுதிகளில் உதவிப் பணிகள் புரிய 1000 இராணுவப் படையினரை அனுப்ப ஏற்பாடு செய்தார்.

fig-1b-the-faulty-tectonic-plates-under-italy

இத்தாலியின் பூகம்பத்தால் ஏற்பட்ட பாதிப்புகள்

1980 இல் இதற்கு முன் ஏற்பட்ட இத்தாலியின் 6.5 ரிக்டர் அளவு பூகம்பத்தில் 2735 பேர் கொல்லப் பட்டார் !  2009 ஏப்ரலில் தாக்கிய பூகம்ப ஆட்டத்திலும் அதற்குப் பிறகு நேர்ந்த பின் அதிர்ச்சிகளில் (Aftershocks) இடிந்து போன கட்டடங்கள் அநேகம்.  காரணம் அவற்றில் பெரும்பான்மையான வீடுகளின் ஆயுட் காலம் நூறாண்டுகளைத் தாண்டியவை !  இத்தாலியின் மத்தியில் சுமார் 26 நகரங்கள் மற்றும் பக்கத்து ஊர்களில் உள்ள இல்லங்கள் பல இடிந்து வீழ்ந்தன !  லாகுயிலா நகரைச் சுற்றியிருந்த பல கிராமங்கள் தகர்ந்து ஏறக்குறைய தரை மட்டமாயின !  லாகுயிலா நகரில் மூன்றில் இரு பங்கு கட்டடங்கள் முறிந்து பிளந்தன !  அவற்றில் பொதுவாக மருத்துவ மனைகள், பல்கலைக் கழகத்தின் விடுதிகள், பெரிய ஹோட்டல் ஒன்றும் அடங்குகின்றன.

நிவாரண உதவிப் பணிகள் செய்ய சுமார் 7000 இத்தாலியர் உழைத்தாக அறியப்படுகிறது.  பூகம்பத்தால் நேர்ந்த பொருட் சேதாரங்களின் மதிப்பீடு சுமார் 2 முதல் 3 பில்லியன் ஈரா (1.5-2.2 பில்லியன் டாலர்) என்று யூகிக்கப்படுகிறது.  இத்தாலியின் உற்பத்தி விற்பனை நிதி சுமார் 1.5 டிரில்லியன் ஈரோ (1 டிரில்லியன் =1000 பில்லியன்).  முதல் பேரிடிப் பூகம்பத்திற்குப் பிறகு ஏற்பட்ட பின்னதிர்ச்சிகளில் பிழைத்த கட்டடங்களும் அடுத்துப் பிளந்து போயின.  அந்த அதிர்ச்சி ஆட்டங்கள் 60 மைலுக்கு அப்பாலிருந்த ரோமாபுரியிலும் எதிரொலித்தன !  அதில் தீவிர நில அதிர்ச்சி 5.6 ரிக்டர் அளவானது.

fig-2-earthquake-force-in-tnt

காப்பாற்றப்பட்டோர் விபரங்களில் சில விந்தையானவை !

1.  முப்பது மணி நேரங்கள் அடைப்பட்டுப் பிழைத்துக் கொண்ட 98 வயதான ஒரு கிழவி லகுயிலாவில் காப்பாற்றப்பட்டு வெளியே கொண்டுவரப் பட்டார்.

2.  நான்கு மாணவர் தகர்ந்து போன பல்கலைக் கழக விடுதிகளில் ஒன்றில் அடைபட்டுக் கிடந்ததை தீயணைப்புப் படையினர் கண்டுபிடித்தார்.  ஆனால் அவர்கள் உயிருடன் மீட்கப் பட்டாரே அல்லது மாண்டு போனாரா என்பது தெரியவில்லை.

3.  22 மணி நேரங்கள் இடிந்த கட்டடத்தில் முடங்கிப் போன 23 வயது மாணவன் ஒருவன் உயிருடன் மீட்கப் பட்டான் !

4.  லாகுயிலா மற்றும் அதைச் சுற்றியிருந்த பகுதிகளில் நீர் வசதி முழுவதும் நிறுத்த மடைந்தது !

fig-1e-italian-zone-tectonic-plates-movements

இத்தாலியில் பூகம்பம் எழுப்பும் அடித்தட்டு நகர்ச்சிக் கோளாறுகள்

(Plate Tectonics Faults)

அசுரப் பூகம்பம் ஒன்று வரப் போகிறது என்று அபாய முன்னறிவிப்பு செய்யும் சாதனம் ஒன்று இன்னும் 21 ஆம் நூற்றாண்டில் கண்டுபிடிக்கப்பட வில்லை !  எரிமலை வெடிப்பு ஏற்படுவதற்கு முன்பு எரிமலை வாயிலில் புகை மண்டலம் எழுகிறது !  சுனாமி ஊர்ந்து கடற்கரை நோக்கி வருவதற்குள் பூதள ஆட்டத்தையோ அல்லது அலைகள் பொங்கி எழுவதையோ உளவுக் கருவிகள் மூலம் ஒருவாறு உணர்ந்து முன்னெச்சரிக்கை  இப்போது செய்ய முடிகிறது ! ஆனல் பூகம்பக் ஏற்படுவதற்குச் சற்று முன்னால் குடிமக்களுக்கு முன்னறிப்பு செய்யும் அபாய அறிவிப்புச் சாதனம் ஒன்று இன்னும் உருவாக்கப் படவில்லை என்பதை விஞ்ஞானிகள் தெரிந்து கொள்ள வேண்டும் !

fig-1e-seismic-sensors

மாபெரும் அட்லாண்டிக் கடலின் விளிம்பில் அடித்தட்டுகள் ஒன்றின் கீழ் ஒன்று புகுந்து அழிக்கப் பட்டதால் (Subduction) மேற்கு மத்திய தரைக்கடல் அடித்தட்டு நகர்ச்சிக் கோளாறுகள் (Plate Tectonics Faults) மிகவும் சிக்கலாகப் போய் விட்டன !  ஆ·பிரிக்கா ஐரோப்பா ஆகிய இரண்டின் அடித்தட்டுகள் ஒருபோக்கில் ஒருங்கே நகர்வது அதற்கொரு காரணம் !  கடந்த 40 மில்லியன் ஆண்டுகளாக அப்பகுதியின் கடல் அடித்தட்டு யாவும் "பின் வளைவுப் பரவலில்" (Back-Arc Spreading) உண்டானவை !  காரணம் படத்தில் செந்நிறத்தில் காணப்படும் கோடு ஸிசிலி மூலமாகச் சென்று வட ஆ·பிரிக்காவில் முடிந்து மோதிக் கொள்ளும் அரங்கம் (Collision Zone) ஐரோப்பாவுக்கு அப்பால் தென்புறம் நோக்கிச் செல்கிறது !  ஆதலால் அந்த அடுத்தட்டுகள் அகண்ட அரங்குகளில் மோதுவதாகத் தோன்றினாலும் பொதுவாக அவை இத்தாலியின் உட்புற நிகழ்ச்சியாகவே பாதிக்கின்றன.

fig-3-plate-tectonics-in-north-america

இத்தாலியின் "அப்பெனைன் மலைத் தொடரை" ஆக்கிய அடித்தட்டு நகர்ச்சியே (The Crustal Plates that formed Italy's Apennine Mountains) அம்மலைத் தொடரின் ஒரு பகுதியைச் சரித்ததாகவும் தெரிகிறது.  மஞ்சள் நிற ஆ·ப்பிரிகன் அடித்தட்டும் செந்நிற அனடோலின் அடித்தட்டும் ஒன்றை ஒன்று நெருக்கி கிரே வண்ணத்தில் உள்ள யுரேசியா அடித்தட்டைக் காற்று வெளியில் தள்ளுகிறது.  அதாவது மரப்பலகைத் தளம் ஒன்றில் ஒரு கார்ப்பெட்டைப் பக்கவாட்டிலிருந்து தள்ளுவது போன்றது.  மேற்குப் பக்கத்தில் மலைகள், ஈர்ப்பியல் விசை கீழ் இழுத்து அடித்தட்டு நகர்ந்து நழுவிச் செல்கின்றன.  பூகம்பத்தால் நேரும் இந்த மலைகளின் மோதல்கள் பூதள ஆட்டங்களை உண்டாக்கிப் பின்னதிர்ச்சிகள் தொடர்ந்து நேப்பிள்ஸ் வரையும் செல்கின்றன !

fig-4-the-himalayan-fault-line

இமாலய மலைச் சரிவுகளை ஆட்டிய நில அதிர்ச்சிகள்

விடுதலை அடைந்த பிறகு 2005 அக்டோபர் 8 ஆம் தேதி முதன்முதல் வரலாற்றில் மிகக் கோரமான ஓர் அசுரப் பூகம்பம் பாகிஸ்தான் வடகிழக்குப் பகுதியை 7.6 ரிக்டர் உச்ச அளவில் குறைந்தது 140 தடவைகள் குலுக்கி ஆட்டி பெரும் காங்கிரீட் கட்டிடங்களைக் கூட கீழே தள்ளிச் சிதைத்து விட்டது!  பாகிஸ்தான் பற்றிக் கொண்ட காஷ்மீரில் மரணம் அடைந்தோர் எண்ணிக்கை 54,000 ஆக அக்டோபர் 16 இல் கணிக்கப் பட்டது, இப்போது 79,000 [அக்டோபர் 20, 2005] ஆக ஏறி யிருப்பதாக அறிவிக்கப் பட்டது.  குளிர்காலம் விரட்டிக் கொண்டு வரும் இந்த தருணத்தில் குறைந்தது 2 மில்லியன் மக்களுக்குத் தங்க வீடுகள் இல்லாமல், தகர்ந்து போன தளங்களில் நின்று தவிக்கிறார்கள்!  இந்தியக் காஷ்மீர்ப் பகுதியில் 2000 பேர் மரணம் அடைந்ததாகத் தெரிகிறது.  2005 செப்டம்பர் மாதம் அமெரிக்காவில் அடித்த சூறாவளி கேட்ரினாவின் ஆற்றலை விட 20 மடங்கு மிகையான பேராற்றல் கொண்டது, காஷ்மீர் பூகம்பம் என்று அமெரிக்காவின் நாளிதழ் வாஷிங்டன் போஸ்ட் கூறுகிறது!  2004 ஆண்டு இறுதியில் இந்தோனேசியா கடற்தட்டில் ஆட்டம் நேர்ந்து உலகப் பெரும் சுனாமிப் பேரலைகள் தாக்கித் தென்னாசியக் கடற்கரைப் பகுதிகளில் 230,000 பேர்கள் மாண்டு போயினர்!  அரை மில்லியனுக்கு மேற்பட்டவர் தமது இல்லங்களை இழந்தனர். 1991 ஆம் ஆண்டு அடித்த சூறாவளிப் பேய்மழையில் பங்களா தேசப் பகுதிகளில் மட்டும் சுமார் 140,000 மக்கள் மடிந்தனர் என்று அறியப்படுகிறது.

fig-5-the-indian-plate-monitoring-satellite

நிலையற்று நடுங்கும் இமய மலைத் தொடர்ச்சிகள்

பூகோளத்தில் உள்ள நீர்ப் பரப்பில் அட்லாண்டிக் கடலின் அகற்சி நீளமாகி வருகிறது!  பசிபிக் பெருகடலின் இடைவெளிச் சிறுகச் சிறுகச் சிறுத்துக் கொண்டு வருகிறது!  நிலப் பகுதிகளை எடுத்துக் கொண்டால் ஈரோப்பில் ஆல்ப்ஸ் மலைத்தொடர் வளர்ச்சியாகி உயரம் இன்னும் அதிகமாகிக் கொண்டே போகிறது! பூதக் கண்டம் ஆ·ப்பிரிக்கா ஒட்டிக் கொண்டிருக்கும் செங்கடல் வடமுனையில் அறுந்து பிளக்கப் போகிறது!  ஹவாயி தீவுகள் வடமேற்குத் திசையில் மெதுவாகப் பெயர்ந்து ஜப்பான் தீவுகளை நோக்கிச் செல்கின்றன!  வட அமெரிக்காவும், ஐரோப்பாவும் எதிர்ப்புறம் நகர்ந்து விலகி இடைவெளியை அகற்சி யாக்கி வருகின்றன!  அமெரிக்காவில் காலி·போர்னியா கடற்கரையில் உள்ள லாஸ் ஏஞ்சலஸ் நகரம் நகர்ந்து, வடபுறமாகச் சரிந்து கொண்டிருக்கிறது!  இமாலயச் சிகரங்களை இந்தியாவின் கனத்த உபகண்டத் தட்டு வடபுறம் அழுத்தி, அழுத்தி அவற்றின் உயரத்தை மிகையாக்கிய வண்ணமா யிருக்கின்றன!  தென்புறத்தில் உள்ள இந்தியக் கடற்தட்டும், வடக்கில் இருக்கும் யுரேசியத் தட்டுடன் முட்டி மோதிக் குதிரை ஏறி, நிலநடுக்கம் உண்டாவது அடிக்கடி நேர்ந்து வரும் இயற்கையின் அபாயத் திருவிளையாடல்கள்!

fig-5-indo-eurasian-plate-movements

அந்த நகர்ச்சி நியதியில் இந்திய உபகண்டம் ஆண்டுக்கு 1.6 அங்குலம் [40 மில்லி மீடர்] வடபுறம் நோக்கித் தள்ளப்படுகிறது!  இவ்விரு தட்டுகளும் முட்டி மோதும் போது, கீழிருக்கும் அடித்தட்டு [Crust] புடைத்து மேல் எழுகிறது!  அப்போது மலை உச்சிகள் இன்னும் உயர மாகின்றன.  இந்தியத் தட்டு வடக்குத் திசையில் நகரும் போது, அடித்தட்டு தணிந்து யுரேசியத் தட்டை மேலே உயர்த்திக் கீழே நுழைகிறது!  இந்த நியதிதான் "தட்டுக் கீழ்நுழைவு" [Plate Subduction] என்று சொல்லப்படுகிறது. இரண்டு தட்டுகளுக்கு இடையே நிகழும் இந்த குவியழுத்த நகர்ச்சியால் [Compressive Motion] இடை நழுவல் [Slip] ஏற்பட்டுப் பூகம்பங்கள் உண்டாக்கும் புவித்தட்டு உந்துப் பழுதுகள் [Thrust Faults] அமைகின்றன. அவற்றில் நமக்கு நன்கு அறிமுகமான முப்பெரும் பழுதுகள்: 2004 இல் சுனாமி உண்டாக்கிய இந்தோனேசியா கடற்தட்டுப் பழுது, கலிஃபோர்னியாவின் ஆண்டிரியா பழுது,  இமயமலைத் தொடரின் இமயப் பழுது ஆகியவை முக்கியமானவை.

major-earthquakes-1

World's Most Earthquake Disasters

 

 

+++++++++++++++

தகவல்:

1. Time Magazine Article, "Nightmare in the Mountains," By: Tim McGrik (Oct 24, 2005)
2. The Kashmir Earthquake By Washington Post (Oct 12, 2005)
3. Himalayan Tectonic Setting Earthquake Program.
4. Earthquake History & Scismicity in the Northwest Region of Indian Sub-continent. [http://asc-india.org/scismic/pakistan.htm]
5. New York Times -As Pakistan Reels, Musharraf Pleads for International Aid By: Somini Sengupta
(Oct 8, 2005)
6. Quake Homeless in Urgent Need of Tents By: Martin Regg Cohn, Asia Bureau (Oct 17, 2005)
7. (a) http://www.thinnai.com/?module=displaystory&story_id=40401222&format=html(Earthquake in Gujarat)
7 (b) http://www.thinnai.com/?module=displaystory&story_id=40401292&format=html(Earthquake in Mexico City)
7 (d) http://www.thinnai.com/?module=displaystory&story_id=40401082&format=html(Major Earthquake in Iran)
7 (e) http://www.thinnai.com/?module=displaystory&story_id=40510211&format=html(Earthquake in Himalayan Zone) (October 21, 2005)
8. Techtonics in Italian Earthquake By Chris Rowan Geologist (April 6 2009)
9.  Italian Earthquake Death Toll Rises to 260 & 28,000 Homeless By Reuters Alertnet (Apr 8, 2009)
10. BBC News Aftershock Hits Italy Quake Zone (April 7, 2009)
11. Rescue Workers Preparing for Surgical Operation on Buildings (April 7, 2009)
12 News Desk – Italy Earthquake 2009 -Worst Quake Since 1980 (April 7 2009)
13 Guardian UK : Italy Earthquake : Stricken L'Quila Suffers Again as Aftershocks Hit By John Hooper (April 7, 2009)

14. http://www.660news.com/2016/08/24/death-toll-in-italian-earthquake-rises-to-120/ [August 24, 2016]

15. http://www.bing.com/news/search?q=Earthquake+In+Italy&qpvt=Earthquake+in+Italy&FORM=EWRE

16. http://www.cnn.com/2016/08/23/europe/italy-earthquake-live-blog/index.html  [August 24, 2016]

17. https://en.wikipedia.org/wiki/List_of_earthquakes_in_Italy  [August 25, 2016]

********************

S. Jayabarathan [jayabarathans@gmail.com] (April 25, 2016)






கேணல் கிட்டு பீரங்கிப் படையணியின் சிறப்புத் தளபதி கேணல் ராயூ(குயிலன்) அவர்களின் 1ம் ஆண்டு வீரவணக்க நாள் இன்றாகும். 


தமிழீழ விடுதலைப் புலிகள் அமைப்பின் வளர்ச்சிக்குப் பெருந்துணையாக நின்ற தளபதி கேணல் ராயூ அவர்கள் புற்றுநோயின் காரணமாக 25-08-2002 அன்று வீரச்சாவடைந்தார்.
ஏழாலையைப் பிறப்பிடமாகக் கொண்ட அம்பலவாணர் நேமிநாதன் என்ற இயற்பெயருடைய ராயு அண்ணை, புலிகளின் இந்தியா-03 பயிற்சிப் பாசறையில் தனது அடிப்படை இராணுவப் பயிற்சியைப் பெற்றிருந்தார்.

நேரிய பார்வை, எதையும் தீர்க்கமாக ஆராய்ந்தறியும் தன்மை, ஓயாத உழைப்பு, இவைகள் ராயு அண்ணையின் அடையாளங்கள். போராளிகளோ பணியாளர்களோ யாரையும் சாதுரியமாக வேலை செய்விப்பதில் அவருக்கு நிகர் அவரேதான். கொடுக்கப்பட்ட பணிகள் உரிய நேரத்தில் செய்து முடிக்கப்படாத பட்சத்தில் அவருடைய கோபங்களையும் பார்க்க முடியும்.

ஆனாலும் அதிலொரு நிதானமிருக்கும். கொடுக்கப்படும் தண்டனைகள் போராளிக்கு வேதனையைக் கொடுப்பதாக இருக்கக்கூடாது, பதிலாக விழிப்பைக் கொடுப்பதாக இருக்க வேண்டும் என்று அடிக்கடி கூறுவார். அவர் கற்றறிந்த விடயங்களை இயலுமானவரை அவரின்கீழ் செயற்படும் போராளிகளுக்குக் கற்றுக்கொடுக்க அவர் தவறியதில்லை.

அதேபோல் போராளியொருவர் புதிய விடயம் ஒன்றை அவருக்குச் சொல்ல விளையும் போது ஒரு மாணவனின் மனநிலையோடு அவற்றைச் செவிமடுத்துக் கற்றுக்கொள்ளவும் அவர் தவறியதில்லை. அவருடைய இந்தக் குணாம்சமே பொறியியற்றுறைப் போராளிகளிடமிருந்து பல புதிய கண்டுபிடிப்புக்கள் வெளிவரக் காரணமாக அமைந்தது.

முடியாது என்றால் முயற்சிக்கவில்லை என்பதே ராயு அண்ணையின் வாக்காக இருந்தது. புதிய முயற்சிகளை ஆதரித்து ஊக்குவிக்கும் அதேவேளை, தேவையற்ற பொருள் மற்றும் வள விரயங்கள் எவற்றையும் அவர் அனுமதித்ததே கிடையாது. அதுமட்டுமல்லாமல் அவர் எந்தவொரு வேலையிலும் முழுத்திருப்தி அடைந்துவிட மாட்டார்.

ஒவ்வொரு கருவியையும் எவ்வாறு மேம்படுத்தலாம் என்பதாகத்தான் அவருடைய அறிவுரைகள் எப்போதும் இருக்கும். போராளிகளிடம் வேலைகளை ஒப்படைத்து விட்டு அந்த வேலைக்குரிய நுட்பங்கள் அப்போராளிகளின் சுய சிந்தனையிலிருந்து வெளிப்படவேண்டும் என்று எதிர்பார்ப்பார். அவ்வாறு அவர்களின் சிந்தனையில் உருவாகும் நுட்பங்களை அவர்களிடம் கற்றறிந்து அவற்றை மேம்படுத்துவது பற்றிக் கலந்தாலோசிப்பார்.

ராயு அண்ணை தன்னுடைய போராட்ட வாழ்க்கையை லெப்.கேணல் ராதா அவர்களுடன் ஒரு தொலைத்தொடர்பாளராகத் தொடங்கினார். அவ்வாறு தொடங்கிய அவரது போராட்டச் செயற்பாடு அவரை ஒரு மாபெரும் சாதனையாளனாக உயர்த்தியது எனில் அவரின் அறிவினை நோக்கிய விடாத தேடலே மிகமுக்கிய காரணமாகும்.

விடுதலைப் போராட்ட வரலாற்றில் விடுதலைப் புலிகள் நிகழ்த்திய இமாலயச் சாதனைகள் பலவற்றின் பின்னால் ராயு அண்ணையின் வெளித்தெரியாத செயற்பாடுகள் பல இருந்தன. தலைவர் அவர்களால் உருவாக்கப்பட்ட விடுதலைப் புலிகளின் தொழில்நுட்பப் பிரிவான "கேணல் ராயு படைய அறிவியல் தொழிநுட்ப ஆய்வு நிறுவன"த்தின் ஆணிவேர் ராயு அண்ணை என்றால் அது மிகையன்று.

விடுதலைப் புலிகளின் தொடக்ககாலத் தொலைத்தொடர்புத் துறையின் வளர்ச்சியில் ராயு அண்ணையின் பங்கு அளப்பரியது. ஒரு தொலைத்தொடர்பாளனாக இருந்தபோது தான் பெற்றுக்கொண்ட அனுபவம் மற்றும் தான் கற்றறிந்த விடயங்களை அடிப்படையாகக் கொண்டு தொலைத்தொடர்புக்கான ஒரு தனித்துறையினைக் கட்டியெழுப்பும் பணியினை மேற்கொண்டார். உலகமே வியந்துபார்த்த விடுதலைப் புலிகளின் தொலைத்தொடர்புக் கட்டமைப்பின் வளர்ச்சியில் ராயு அண்ணையின் உழைப்பு ஒவ்வொரு கட்டத்திலும் மறைபொருளாக இருந்தது.

இந்தியப் படையினருடனான போர்க்காலப் பகுதி. மணலாற்றுக் காட்டுப்பகுதியில் இந்தியப் படையினர் தமது இராணுவ நடவடிக்கைகளைத் தீவிரப்படுத்தியிருந்த நேரம். இராணுவத்தினரின் நகர்வுகளைக் கட்டுப்படுத்துவதற்காக தலைவரின் சிந்தனையில் உதித்த "ஜொனி" மிதிவெடிக்கு அப்போதிருந்த இக்கட்டான சூழ்நிலையில் கிடைத்த பொருட்களைக் கொண்டு வடிவம் கொடுத்த பெருமை ராயு அண்ணையையே சாரும்.

கடலிலே முதலாவது கடற்கரும்புலித் தாக்குதல் நடத்துவதற்கான திட்டம் தலைவர் அவர்களால் போடப்பட்டு அதற்கான பணிகள் ராயு அண்ணையிடமும் அப்போதைய கடற்புறா (கடற்புலிகள் என்று பெயர் பெறுவதற்கு முன் இயங்கிவந்த விடுதலைப் புலிகளின் கடல் நடவடிக்கை அணி) தளபதியிடமும் ஒப்படைக்கப்பட்டிருந்தது.

முன்னெப்போதும் நடத்தப்படாத ஒரு புதியவகைத் தாக்குதலாக அப்போது அந்தக் கடற்கரும்புலித் தாக்குதல் இருந்தது. வெடிபொருள் தொகுதியை எவ்வாறு படகில் பொருத்துவது, எந்த வடிவில் பொருத்துவது என்பன தெரியாமல் இருந்த விடயங்கள். ஆயினும் ராயு அண்ணை அவற்றைச் செய்து முடித்தார்.

பலகட்டப் பரிசோதனைகளைச் செய்து அவற்றிலிருந்து ஒரு வடிவத்தினைச் செய்து உருவாக்கியிருந்தார். ராயு அண்ணை இதனை திறம்பட முடித்துவிடுவார் என்ற தலைவரின் நம்பிக்கையை நிரூபித்துக் காட்டினார். அன்றிலிருந்து தன்னுடைய இறுதிக் காலம்வரை கடற்கரும்புலிகளின் தாக்குதற் படகுகளிற்கான வெடிமருந்துத் தொகுதியினை மேம்படுத்துவதற்காக அயராது உழைத்துக் கொண்டிருந்தார்.

தொடக்க காலத்திலிருந்து மோட்டார் மற்றும் எறிகணைகளின் செயற்பாடுகளைக் கற்றறிந்து புலிகளின் சுயதயாரிப்பான "பசிலன்" எனும் எறிகணைச் செலுத்தியின் தயாரிப்புக்கு அடித்தளமிட்டுக் கொடுத்தார். இரண்டாம் கட்ட ஈழப்போர் தொடங்கியபோதே புலிகளின் பசிலன் பீரங்கிகள் சிறிலங்கா இராணுவத்துக்கு சிம்ம சொப்பனமாக அமைந்திருந்தன. யாழ்.கோட்டை, மாங்குளம் போன்ற முகாம்கள் கைப்பற்றப்பட்ட தாக்குதல்களில் இப்பீரங்கிகளின் பங்கு அளப்பரியன.

1996 ம் ஆண்டு "ஓயாத அலைகள்-01" இராணுவ நடவடிக்கை மூலம் புலிகள் முல்லைத்தீவு இராணுவ முகாமைக் கைப்பற்றியபோது இரண்டு ஆட்லறிகள் புலிகள்வசம் வீழ்ந்தன. இயக்கத்தைப் பொறுத்தவரை அவை அப்போது பரிச்சயமற்ற பொருட்களாகவே இருந்தன.

இராணுவத்திடமிருந்து கைப்பற்றப்பட்ட மட்டுப்படுத்தப்பட்டளவிலான கையேடுகள் மற்றும் இதர அறிவியல் ஏடுகள் என்பவற்றின் உதவியுடன் அவ்விரு ஆட்லறிகளையும் பரிச்சயமிக்க போராயுதங்களாக மாற்றியதில் ராயு அண்ணையின் பங்கே முதன்மையானது. முதன்மையானது என்பதைவிட முழுமையானது என்பதே பொருத்தமாக இருக்கும்.

அக்காலப் பகுதியில் அவர் இரவில் நித்திரை கொள்வதே அரிதான விடயம். பொதுவாக ஆட்லறிகளுக்கான சூட்டுக்கட்டுப்பாட்டுத் தொகுதிகள் (Fire Control) அவ் ஆட்லறிகளின் தயாரிப்பு நிறுவனங்களினால் வழங்கப்பட்டவையாகவே இருக்கும். முல்லைத்தீவில் கைப்பற்றப்பட்ட சூட்டுக்கட்டுப்பாட்டுத் தொகுதியும் அவ்வாறானதொன்றே. நிறைவான ஆட்லறிச் சூட்டுக்கு அவற்றின் செயற்பாடு போதுமானதாகவே இருக்கும்.

ஆயினும் ராயு அண்ணை அதனோடு திருப்திப்பட்டு விடவில்லை. சுயமாக ஆட்லறிக்கான சூட்டுக்கட்டுப்பாட்டுத் தொகுதியினை உருவாக்கும் பணியில் போராளிகளை ஈடுபடுத்தினார். சாதாரண சூட்டுக்கட்டுப்பாட்டுத் தொகுதியைவிட மேம்பட்ட பல வசதிகளோடு சூடுகளை வேகமாகவும் மேலும் துல்லியமாகவும் வழங்கக்கூடியவாறு பல்வேறுபட்ட வசதிகளுடன் புதிய சூட்டுக்கட்டுப்பாட்டுத் தொகுதி அவரின் வழிகாட்டலில் உருவாக்கப்பட்டது.

சிறிலங்கா படையதிகாரிகளாலேயே விடுதலைப் புலிகளின் ஆட்லறி சுடுதிறன் வியப்பாகப் பார்க்கப்படும் அளவுக்கு அதை வளர்த்தெடுத்த பெருமை ராயு அண்ணையையே சாரும். வேகமான செயற்பாடு மற்றும் துல்லியமான சூடு என்பவற்றினூடாக பீரங்கிப் படையணியின் நம்பகத்தன்மை போராளிகளிடமும் வளர்ந்திருந்தது.

ஜெயசிக்குறு எதிர்ச்சமர், ஓயாத அலைகள் என்ற குறியீட்டுப் பெயரிலமைந்த தொடர் நடவடிக்கைகள், ஆனையிறவுக்கான சமர் போன்றவற்றில் ராயு அண்ணையின் கட்டளையில் செயற்பட்ட பீரங்கிப் படையணியின் செயற்பாடு முக்கியமான பங்கினைப் பெற்றிருந்தது.

சிறிலங்கா அரசினை சமாதானம் நோக்கி இழுத்துவந்த சமரான தீச்சுவாலை முறியடிப்புச் சமரில் எதிரியின் தீச்சுவாலையை எதிரியை நோக்கியே திருப்பிவிட்டதில் ஒருபுறத்தில் ராயு அண்ணையின் கட்டளையில் செயற்பட்ட பீரங்கிப்படை பெரும் பங்காற்றியது எனில் மறுபுறத்தில் ராயு அண்ணையின் சிந்தனையில் உருவான கவச எதிர்ப்புக் கண்ணிகள் தம்பங்கினையும் ஆற்றின.

அப்போதிருந்த சூழலில் கண்ணிவெடிகளை உருவாக்குவதற்குத் தேவையான பொருட்களை உடனடியாகப் தருவிக்கமுடியாத நிலை. ராயு அண்ணையின் சிந்தனையோ கண்ணிவெடி தயாரிப்பதற்கு என்ன பொருட்கள் தேவையென்ற நிலையிலில்லாமல், இருக்கும் பொருட்களைக்கொண்டு எவ்வாறு கண்ணிவெடி தயாரிக்கலாம் என்பதாக இருந்தது.

பல்வேறு காரணங்களால் வெடிக்காத நிலையில் மீட்கப்பட்ட எதிரியின் எறிகணைகள் எதிரிகளின் கவசங்களையே குறிவைக்கும் கண்ணிவெடிகளாக உருவெடுத்தன. ஆனையிறவை மீளக் கைப்பற்றும் எதிரியின் கனவு அப்போது தகர்க்கப்பட்டது.

1992 ம் ஆண்டின் நடுப்பகுதி. யாழ் மாவட்டத்தைச் சேர்ந்த பிரிவுகளுக்குரிய போராளிகள் சிலர் சிறுத்தைப் படையணியின் பயிற்சிக்குச் செல்வதற்காக மாவட்டத் தலைமைச் செயலகத்திற்கு அனுப்பப்பட்டிருந்தோம். அங்குதான் சிறுத்தைப் படையணியின் முதலாவது ஆண்கள் அணிப் போராளிகளுக்கான தெரிவு நடைபெற்றது.

சிறுத்தைப் படையணியின் சிறப்புத் தளபதியாகவிருந்த ராயு அண்ணையே படையணிக்கான போராளிகளைத் தெரிவு செய்வதற்கு வந்திருந்தார். அன்று ராயு அண்ணையின் மூலம் தெரிவாகி, சிறுத்தைப் படையணி, பின்னர் பொறியியற்றுறை ஆகியவற்றில் அவரின் கீழ் பணியாற்றும் வாய்ப்புக் கிடைத்தது. ஒரு தந்தையாய், சகோதரனாய் அவர் போராளிகளை வழிநடாத்தினார்.

ஒவ்வொரு விடயங்களைக் கவனித்துக்கொள்வதற்கும் அவர் பொறுப்பாளர்களை நியமித்திருந்த போதிலும், போராளிகளுக்கான உணவு, உடை என்று அனைத்து விடயங்களிலும் கவனமெடுத்து நடந்துகொண்டார். போராளிகள் தமக்குள் கதைக்கும் போது அவரை "அப்பா" என்றே விழிப்பது வழமை. அந்தளவிற்கு அவர் ஒரு தந்தையாக போராளிகள் மனதில் இடம்பிடித்திருந்தார். அவருக்குத் தலைவரால் வழங்கப்பட்டிருந்த பல்வேறுபட்ட பணிகளுக்கு மத்தியில் தன்னால் வளர்த்தெடுக்கப்படும் போராளிகள் என்ற கரிசனையோடு எம்மை உருவாக்கிய விதம் என்றுமே நெஞ்சை விட்டகலா நினைவுகள்.

1993 ம் ஆண்டின் இறுதிப்பகுதி. தென்மராட்சியில் ஓரிடத்தில் எமக்கான சிறப்புப் பயிற்சிகள் நடைபெற்றுக்கொண்டிருந்தன. திசைகாட்டி நகர்வுப் பயிற்சிகளை நாம் முகாமிற்கு வெளியேதான் மேற்கொள்வதுண்டு. தென்மராட்சி மற்றும் வடமராட்சிப் பகுதிகளில் காணப்படும் சதுப்புநிலக் காடுகளே இவ்வாறான நகர்வுகளுக்காகப் பயன்படுத்தப்பட்டன. நகர்வுகளுக்கான தொடக்க மற்றும் முடிவுப் புள்ளிகளாக இப்பகுதிகளில் அமைந்திருக்கும் சிறிய கோவில்களே தெரிவுசெய்யப்படும்.

அனைத்து அணிகளதும் நகர்வுகளை தானே நேரில் வந்து கண்காணிப்பதுடன் அந்தந்த இடங்களிலேயே நகர்வு உத்திகளைக் கற்றுத்தருவார். நகர்வில் ஈடுபடும் போராளிகளுக்கான உணவுப் பொருட்களை தானே எடுத்துவருவார். இருந்தபோதிலும், போராளிகளைக் கண்டிக்க வேண்டிய இடத்தில் கண்டிக்கவும் தண்டிக்க வேண்டிய இடத்தில் தண்டிக்கவும் அவர் தவறுவதில்லை.

ஒருமுறை எமது நகர்வு புத்தூரிலிருந்து தென்மராட்சியின் வரணிப் பகுதி நோக்கி இருந்தது. இவ்விரு பகுதிகளுக்கும் இடைப்பட்ட சதுப்புநிலக் காடுகளே நகர்வுப் பகுதியாக பயிற்சி ஆசிரியரால் தேர்வுசெய்யப்பட்டிருந்தது. எமது நகர்வுக்காக ஒவ்வோர் அணிக்கும் குறிப்பிட்டளவு குடிநீரே தரப்படும். மேலதிகத் தண்ணீரை நாம் எங்கும் பெறக்கூடாது என்பது கட்டளை.

அன்று எமது நகர்வுகளைக் கண்காணிப்பதற்காக வந்த ராயு அண்ணையின் வாகனம் சேற்றில் புதைந்துவிட எமது அணியினரே அதனை வெளியெடுக்கும் பணியினையும் செய்யவேண்டியதாகிவிட்டது. அந்தக் களைப்பின் காரணமாக எமக்கு வழங்கப்பட்ட தண்ணீரையும் குடித்து முடித்துவிட்டோம்.

ஆனால் போக வேண்டிய மீதித் தூரமோ இன்னும் அதிகமிருந்தது. இடையிலிருந்த கோவில் கிணறு ஒன்றில் மேலதிக தண்ணீரை நிரப்பிவிட்டோம். பயிற்சி ஆசிரியர் தண்டனை வழங்கினாலும் ராயு அண்ணை காப்பாற்றிவிடுவார் என்று எமக்கு நாமே சமாதானமும் சொல்லிக்கொண்டோம்.

பயிற்சி ஆசிரியருக்கும் விடயம் போய்விட்டது. நாம் காரணத்தைக்கூறி தண்டனையிலிருந்து தப்பலாம் என முயற்சித்தோம். ஆனால் ராயு அண்ணையின் பதில் எம்மால் நிராகரிக்க முடியாததாக இருந்தது. அவர் கூறியது இதுதான். "நீங்கள் சிறப்புப் படையணிப் போராளிகள். நீங்கள் நடவடிக்கையில் ஈடுபடும் இடங்களில் போதியளவு வளங்கள் கிடைக்குமென்று எதிர்பார்க்க முடியாது.

நீங்கள் நடவடிக்கையில் ஈடுபடும்போது திட்டமிடப்படாத எதிர்பாராத பணிகள் காத்திருக்கலாம். அதற்கெல்லாம் உங்களை நீங்கள் தயார்ப்படுத்த வேண்டுமாயின் நீங்கள் இவ்வாறான சாக்குப்போக்குகள் சொல்ல முடியாது". இதன்பிறகும் எம்மால் அவருடன் எதைக் கதைக்க முடியும்? தண்டனை உறுதி. எமதணிக்கான அடுத்துவந்த நகர்வு குடிநீரின்றி முடிந்தது.

1993 ம் ஆண்டு பலாலிப் படைத்தளத்தினுள் கரும்புலித் தாக்குதல் ஒன்றினை நடாத்துவதற்குத் தலைவரினால் திட்டமிடப்பட்டிருந்தது. கரும்புலிகளுக்கான வெடிமருந்துத் தொகுதிகளை உருவாக்குவதற்கான பணி ராயு அண்ணையினால் அவரின் கீழிருந்த வெடிமருந்துப் பயிற்சிபெற்ற போராளியின் பொறுப்பில் ஒப்படைக்கப்பட்டிருந்தது.

அவருடன் அப்போது வெடிமருந்துப் பயிற்சியினை மேற்கொண்டிருந்த நாமிருவரும் அவ்வேலையில் இணைக்கப்பட்டிருந்தோம். ராயு அண்ணையோ, வேலையை ஒப்படைத்ததோடு நில்லாமல் வேலையின் ஒவ்வொரு கட்டத்திலும் தானும் எம்முடன் கூடவிருந்து அந்த வேலைகள் நிறைவடைந்தபோது, நாமே தனித்து அவ்வேலைகளைச் செய்யுமளவிற்கு எம்மை உருவாக்கி விட்டிருந்தார்.

ஒவ்வொரு விடயங்களைச் செய்யும்போதும், அவ்விடயங்களில் அவர் காட்டும் ஈடுபாடு மிகவும் நேர்த்தியானது. அதே நேர்த்தியினையே போராளிகளிடமும் வேலைகளில் எதிர்பார்ப்பார்.

எனது உடல்நிலையில் எதிர்பாராத விதமாக ஏற்பட்ட இயலாமை காரணமாக என்னால் பயிற்சியினைத் தொடர முடியவில்லை. சிலகாலம் வைத்தியசாலையில் இருக்கவேண்டியிருந்தது. இனிமேல் பயிற்சியில் ஈடுபடவே முடியாது என்ற நிலை. அடுத்து என்னவென்று தெரியாத சூழல்.

அவ்வாறான சூழ்நிலையிலிருந்து என்னை மீட்டு எனக்குப் பொருத்தமான பணிகளில் என்னை ஈடுபடவைத்து, எனது உடல்நிலையில் ஏற்பட்ட இயலாமை என்னையும் எனது போராட்டச் செயற்பாட்டையும் பாதிக்காது காத்தது ராயு அண்ணையே. அவரின் அணுகுமுறைகள் எப்போதுமே போராளிகளிடமிருந்து அவர்களது செயற்பாடுகளைத் தனித்தன்மையோடு வெளிக்கொணர்வதாகவே இருக்கும்.

ஒவ்வொரு போராளியிடமும் இருக்கும் தனித்தன்மைகளைச் சரியான முறையில் இனங்கண்டு அதனை வெளிக்கொணர்வதில் அவருக்கு நிகர் அவரேதான். ஆயினும் கொடிய புற்றுநோய் அவரைச் சிறிதுசிறிதாக அரித்துக்கொண்டிருந்த விடயத்தை அவரால் அறிந்துகொள்ள முடியாததாகவே காலம் அவருக்குத் தீர்ப்பெழுதி விட்டது.

அடிக்கடி வந்துபோகும் வயிற்றுவலியினை அவர் சாதாரண வயிற்றுவலியாக எண்ணியே மாத்திரைகளைப் பாவிப்பதோடு நிறுத்திக்கொண்டார். நோய்வாய்ப்பட்டுப் படுக்கையில் இருந்தபோதுகூட அவர் இயங்கிக்கொண்டேயிருந்தார், அனைவரையும் இயக்கிக்கொண்டுமிருந்தார்.

தீச்சுவாலை முறியடிப்புச் சமரின்போதே ராயு அண்ணையால் முழு உற்சாகமாகப் பணியாற்ற முடியாதபடி அவரது உடல்நிலை தளர்ந்திருந்தது. ஆனாலும் அந்த மூன்று நாட்களும் அவர் முழுமையாகப் பாடுபட்டார். நோய் முற்றியநிலையில் அவர் அவதிப்பட்டுக் கொண்டிருந்த காலத்தில் வடகடலில் ஒரு கடற்கரும்புலித் தாக்குதல் நடத்தப்பட்டது.

யாழ்ப்பாணத்தில் நின்ற இராணுவத்தினருக்கான எரிபொருள் வழங்கலைச் செய்த எரிபொருள் தாங்கிக் கப்பல் மீதே அத்தாக்குதல் நடத்தப்பட்டது. ஆனால் எதிர்பார்த்தது போல் அக்கப்பல் தீப்பிடிக்கவுமில்லை, மூழ்கிப் போகவுமில்லை.

வழமையாகவென்றால் ராயு அண்ணையிடம் ஓடிவந்து நடந்த சிக்கல்களை ஆராய்ந்து அதற்குரிய மாற்றுத் திட்டங்களை அறிந்துகொள்வார்கள். ஆனால் இப்போது ராயு அண்ணையின் உடல்நிலை மிகமிக மோசமாக இருந்தது.

இந்நிலையில் எப்படி அவரைப் போய்க் கரைச்சல் படுத்துவது என்று கடற்புலிகளின் சிறப்புத் தளபதி சூசை நினைத்தார். ஆனாலும் தாக்குதல் பிசகியதைக் கேள்விப்பட்ட ராயு அண்ணையே நேரடியாக தளபதி சூசையையும் தொடர்புடைய மற்றப் போராளிகளையும் அழைத்து விடயத்தைக் கேட்டறிந்தார்.

படுத்த படுக்கையில் இருந்தும்கூட அக்கப்பலை மூழ்கடிப்பதற்கான வெடிபொருள் நுட்பம் பற்றிய ஆலோசனையைக் கடற்புலிகளுக்குச் சொல்லிக் கொடுத்தார். பின்னாளில் அவர் சொல்லிக் கொடுத்த அந்த நுட்பத்தைப் பயன்படுத்தி ஒரு கடற்கரும்புலித் தாக்குதல் மூலம் படையினரின் எண்ணெய்த் தாங்கிக் கப்பல் மூழ்கடிக்கப்பட்டது.

பின்னாளில் அவரின் பெயரிலேயே தலைவரால் உருவாக்கப்பட்ட 'கேணல் ராயு படைய அறிவியல் தொழிநுட்ப ஆய்வு நிறுவனப் பொறுப்பாளர்களில் ஒருவரிடம் தலைவர் சொன்ன வார்த்தைகள் "நீங்கள் அனைவரும் சேர்ந்தாவது ராயுவின் இடத்தினை நிரப்ப முயற்சிக்க வேண்டும்".

தமிழீழ தாய் மண்ணின் விடியலுக்கான பயணத்தில் விழிமூடிய இந்த வீரவேங்கையை இன்றைய நாளில் நெஞ்சில் நிறுத்தி நினைவு கூருகிறோம்.

https://www.youtube.com/watch?v=NQdI_dOp9DI

25.08.2002 அன்று சுகயீனம் கரணமாக சாவடைந்த கேணல் ராயூ அவர்களின் இறுதிவணக்க நிகழ்வு தமிழீழம் - 10.09.2002


ஈழம்ரஞ்சன்.





செப்டம்பர் 26
1987 தமிழீழ தியாகி லெப்.கேணல் திலீபன் நினைவு தினத்தில்
6 சதவீத அருந்ததியர் உள இட ஒதுக்கீடு கேட்டு தன்னுயிரை தீக்கிரையாக்கிய நெருப்பு தமிழன் நீலவேந்தன் வீரவணக்க நாளில் ....

அருந்ததியர் அரசியல் விடுதலைக்கான சமூக நீதி எழுச்சிப்
பொதுக்கூட்டம்
எழுச்சியரை
சமூகநீதி போராளி
அய்யா இரா அதியமான்

அழைக்கிறார்

நிகழ்வுகள் :-
மாலை 3 மணி திருப்பூரில் வீரவணக்கம் .
மாலை 5 மணி தாராபுரம் பொதுக்கூட்டம்

நீலவேந்தன் நீலப்படை திரளட்டும் !!!
சமூக நீதி உரிமை போர் தொடரட்டும் !!!

ஆதித்தமிழர் பேரவை







முதல் இந்திய விடுதலை போராட்ட வீரர் நெல்லை நெற்கட்டான் செவ்வயல் பாளையத்தலைவர் ஒண்டிவீரன் நினைவு நாளான இன்று (20-8-2016) ஆதித்தமிழர் பேரவையின் சார்பில் பேரவையின் நிருவனத்தலைவர் இட ஒதுக்கீட்டு போராளி அய்யா அதியமான் அவர்களின் தலைமையில் பல்லாயிரக்கணக்கான நீலச்சட்டை தொண்டர்கள் வீரவணக்கம் செலுத்தினர்.

*நிகழ்வு விபரம்*
""""""""""""""""""""""""
காலை 11.30 மணியளவில் நெற்கட்டான் செவ்வயலில் வீரவணக்க அஞ்சலி செலுத்திய பின்னர் இளைஞர்கள் மத்தியில் *செத்தமாட்டை தூக்கமாட்டோம், மலக்குழியில் இறங்க மாட்டோம், மானத்தோடு வாழ்வதற்கு 5 ஏக்கர் நிலம் வழங்க வேண்டும்* என நான் அரசுகளை வலியுறுத்தி முழக்கமிட இளைஞர்களும் தொடர்ந்து முழக்கமிட்டு சபதமேற்றுக்கொண்டனர்.

பின்னர் நெல்லையில் உள்ள மணிமண்டபத்திற்கு மாலை 5.30 மணியளவில் வண்ணாரப்பேட்டையில் இருந்து ஊர்வலமாக சென்று மாமன்னர் ஒண்டிவீரன் சிலைக்கு மாலை அணிவித்து மரியாதை செலுத்தப்பட்டது, அங்கும் மேற்கண்ட கோரிக்கைகளை வலியுறுத்தி முழக்கமிட்டு இளைஞர்களும், பேரவை தொண்டர்களும் சபதமேற்றுக் கொண்டனர்.

_மாமன்னர் ஒண்டிவீரன் வீரவணக்க நிகழ்வில்_
_ஆதித்தமிழர் பேரவை
சார்பில் நிறைவேற்றப்பட்ட தீர்மானங்கள்_

*கண்டனத் தீர்மானம்*
************************
தீர்மானம்.1)
ஒவ்வொரு ஆண்டும் இயல்பாக நடக்க வேண்டிய சுதந்திர போராட்ட வீரர் ஒண்டிவீரன் அவர்களின் நினைவு நாளான ஆகஸ்ட் 20-ம் தேதி முதல் தமிழக அரசின் வழிகாட்டுதலால் 144 தடை உத்தரவு போட்டு காவல்துறையினர் மக்கள் மத்தியில் கடும் அச்சுருத்தலை ஏற்படுத்துவது மக்கள் விரோத செயலாகும் இம் மக்கள் விரோதச்செயலை ஆதித்தமிழர் பேரவை வன்மையாக கண்டிக்கின்றது,

முறையாக காவல்துறை அனுமதி கோரி *மத்திய அரசின் புதிய குலக்கல்விக் கொள்கைக்கு* எதிராக கோவில்பட்டியில் நடக்க இருந்த பொதுக்கூட்டத்திற்கு கடைசி நேரத்தில் அனுமதி மறுத்து கோவில்பட்டி காவல்துணை கண்காணிப்பாளர் வழங்கியுள்ள உத்தரவு மக்கள் உரிமை போராட்டத்தை நசுக்கும் செயலாகும். எனவே தாழ்த்தப்பட்ட ஒடுக்கப்பட்ட மக்கள் நடத்தும் பொதுக்கூட்டம் மற்றும் மக்கள் உரிமைப் போராட்டங்களுக்கு தொடர்ந்து அனுமதி மறுத்து வருவதும் மக்கள் விரோத நடவடிக்கையே காட்டுகிறது இச்செயலையும் ஆதித்தமிழர் பேரவை வன்மையாக கண்டிக்கின்றது.

*மத்திய அரசை வலியுறுத்தி*
""""""""""""""""""""""""""""""""""""""""
தீர்மானம்.2)
மத்திய மோடி அரசு கொண்டுவர இருக்கிற *புதிய கல்வி கொள்கையை* உடனடியாக கைவிட வேண்டும், புதிய கல்விக்கொள்கை என்ற பெயரில் *குலக்கல்வி* முறையைக் கொண்டு வந்து ஒடுக்கபட்ட மக்களின் பிள்ளைகளின் படிபைத் தொடரமுடியாமல் இடைமுறிவை ஏற்படுத்தி அம் மாணவர்களை மலம் அள்ளுவது, முடி வெட்டுவது, துணி வெளுப்பது, செருப்புத் தைப்பது போன்ற சாதி சார்ந்த தொழில்களில் ஈடுபடுத்த மோடி அரசு திணிக்க நினைக்கும் பார்பனிய சதியை முறியடிக்க எங்கள் அமைப்பு தனியாகவும், தோழமை இயக்கங்களுடனும் இணைந்து தொடர் நடவடிக்கைகளில் ஈடுபடும் என்று இக்கூட்டம் தீர்மானிக்கிறது.

தீர்மானம்.3)
பசுப்பாதுகாப்பு என்ற பெயரில் நாடு முமுவதும் நடந்தேரும் இந்து மதவெறியர்களின் கொலைவெறிச் சம்பவங்கள் மற்றும் காட்டுமிராண்டித்தனமான தாக்குதல்களை தடுத்து நிறுத்தி கடும் நடவடிக்கை எடுத்து தாழ்த்தப்பட்ட மற்றும் இசுலாமிய மக்களுக்கு உரிய பாதுகாப்பு வழங்கிட வேண்டும் என கேட்டுக்கொள்வதோடு, இதைப்போன்ற கொடூரச் செயல்களை தடுத்து நிறுத்தி நடவடிக்கை மேற்கொள்ள வேண்டிய பிரதமர், மாறாக இனிமேல் தாக்குதல் நடத்துவது என்றால் என்னைத் தாக்குங்கள் என்று கூறியிருப்பது மக்களை ஏமாற்றும் செயலாகும், இப்படி மக்களை ஏமாற்றுவது மட்டுமில்லாமல் இந்து மதவெறியர்களை ஊக்கபடுத்தும் செயலாகவே இது அமைந்துள்ளது, இந்த செயலை இக்கூட்டம் வன்மையாகக் கண்டிக்கிறது.

தீர்மானம்.4)
செத்த மாட்டைத் தூக்கமாட்டோம் மலக்குழியில் இறங்கமாட்டோம், மறுவாழ்வு பெற்றிட ஜந்து ஏக்கர் நிலம் வழங்க வேண்டும் என குஜராத்தில் நடந்து வரும் ஒடுக்கப்பட்டடோர் உரிமை முழக்க போராட்டத்தை எங்கள் அமைப்பு வரவேற்று முழு ஆதரவை தெரிவித்துக் கொள்கின்றது,
மேலும் இதே போன்ற போராட்டத்தை தமிழகத்திலும் விரைவில் ஆதித்தமிழர் பேரவை தொடங்கும் என்று இக்கூட்டம் முடிவு செய்கிறது.

*தமிழக அரசை வலியுறுத்தி*
*******************************
தீர்மானம்.5)
நெல்லை மாநகரில் அமைந்துள்ள மணிமண்டபத்துக்கு ஒதுக்கப்பட்ட 64 செண்ட் நிலத்தையும், முழுப்பயன்பாட்டிற்கு எடுத்து பூங்கா மற்றும் குடிநீர் உள்ளிட்ட வசதிகளை ஏற்படுத்துவதோடு, பொதுமக்களின் பார்வைக்கு ஒண்டிவீரன் பற்றிய குறிப்புகள் அடங்கிய கல்வெட்டுக்களை வைக்க வேண்டும் என்றும், அதேபோன்று குதிரையில் அமர்ந்தபடி உள்ள மாமன்னர் ஒண்டிவீரன் சிலையை மணிமண்டபத்துக்கு வெளியே வைக்க வேண்டும் எனவும், மண்டபத்துக்குள்ளும் சிலை நிறுவ வேண்டும் எனவும் தமிழக அரசை இக்கூட்டம் கேட்டுக் கொள்கிறது.

தீர்மானம்.6)
மாமன்னர் ஒண்டிவீரன் வாரிசுதாரர்களை கணக்கெடுத்து அவர்களுக்கு, அரசுக்குடியிருப்பும், உழவுநிலம் பென்சன் போன்றவைகளை உடனடியாக வழங்கிட நடவடிக்கை மேற்கொள்ள வேண்டும் என தமிழக அரசைக் இக்கூட்டம் கேட்டுக்கொள்கிறது.

நன்றி.

என்றும் அய்யாவின் வழியில்...
ஆ .நாகராசன்.
பொதுச்செயலாளர்
 ஆதித்தமிழர் பேரவை
20.8.2016
திருநெல்வேலி

என்றும் சாதி ஒழிப்புப் பணியில் 
ஆதித்தமிழர் பேரவை, தமிழ்நாடு

வலைத்தளம்: www.aathithamizharperavai.com
வலைப்பூ: www.atptamilnadu.blogspot.com
முகநூல் பக்கம்: https://www.facebook.com/aathithamizhar.peravai

Powered by Blogger.